ٹرمپ نے ایران سے ڈیل کیلئے لچک دکھائی مگر شرائط برقرار، ترجمان وائٹ ہاؤس کیرولین لیوٹ
یوتھ ویژن نیوز :(واشنگٹن ) وائٹ ہاؤس کی پریس سیکرٹری کیرولین لیوٹ نے کہا ہے کہ امریکی صدر ڈونلڈ ٹرمپ نے ایران کے ساتھ ممکنہ معاہدے کے لیے لچک کا مظاہرہ کیا ہے، تاہم امریکا اپنی بنیادی شرائط پر قائم ہے اور ان میں کسی قسم کی نرمی نہیں کی جائے گی۔ میڈیا سے گفتگو کرتے ہوئے انہوں نے واضح کیا کہ موجودہ جنگ بندی کے باوجود امریکا کا ” آپریشن اکنامک فیوری“ اور ایران کی بحری ناکہ بندی بدستور جاری ہے۔
امریکا اپنی شرائط پر قائم
کیرولین لیوٹ نے کہا کہ امریکا خطے اور عالمی مفاد کو مدنظر رکھتے ہوئے اپنی پالیسی پر قائم ہے اور ایران سے مطالبہ کیا گیا ہے کہ وہ اپنا افزودہ یورینیم امریکا کے حوالے کرے۔ ان کے مطابق صدر ٹرمپ نے اگرچہ سفارتی عمل کو آگے بڑھانے کے لیے لچک دکھائی ہے، لیکن قومی سلامتی کے معاملات پر کوئی سمجھوتہ نہیں کیا جائے گا۔
جنگ بندی، مگر دباؤ برقرار
ترجمان وائٹ ہاؤس کا کہنا تھا کہ جنگ بندی کے باوجود ایران پر اقتصادی اور بحری دباؤ برقرار رکھا گیا ہے تاکہ مذاکراتی عمل کو مؤثر بنایا جا سکے۔ انہوں نے واضح کیا کہ صدر ٹرمپ نے جنگ بندی کے لیے کوئی حتمی ڈیڈ لائن مقرر نہیں کی، تاہم حالات کے مطابق آئندہ فیصلے کیے جائیں گے۔
ایران کے جواب کا انتظار
ایک سوال کے جواب میں کیرولین لیوٹ نے کہا کہ امریکا اس وقت ایران کے باضابطہ جواب کا انتظار کر رہا ہے۔ ان کے مطابق واشنگٹن نے اپنی تمام شرائط واضح کر دی ہیں اور اب یہ ایران پر منحصر ہے کہ وہ کس حد تک پیش رفت کرتا ہے۔ انہوں نے مزید کہا کہ جنگ بندی میں ممکنہ توسیع کے حوالے سے بھی امریکا متفقہ اور واضح ردعمل چاہتا ہے۔
