چار فریقی اجلاس: مصر اور ترکیہ کے وزرائے خارجہ اسلام آباد پہنچ گئے

یوتھ ویژن نیوز : (ثاقب ابراہیم سے) مشرق وسطیٰ کی کشیدہ صورتحال اور ایران جنگ بندی کے تناظر میں پاکستان کی میزبانی میں ہونے والے چار فریقی وزرائے خارجہ اجلاس کے لیے مصر اور ترکیہ کے وزرائے خارجہ اسلام آباد پہنچ گئے ہیں، جہاں اہم علاقائی اور عالمی امور پر مشاورت متوقع ہے۔

چار فریقی اجلاس کے لیے وزرائے خارجہ کی آمد

تفصیلات کے مطابق مصر کے وزیر خارجہ ڈاکٹر بدر عبدالعاطی پاکستانی ہم منصب کی دعوت پر چار ملکی کانفرنس میں شرکت کے لیے وفاقی دارالحکومت پہنچے، جہاں اسلام آباد ایئرپورٹ پر ان کا پرتپاک استقبال کیا گیا اور اعلیٰ حکام نے ان کا خیرمقدم کیا۔

ترکیہ کے وزیر خارجہ حکان فدان کی شرکت

بعد ازاں ترکیہ کے وزیر خارجہ حکان فدان بھی اجلاس میں شرکت کے لیے اسلام آباد پہنچے، پاکستان آمد پر ایڈیشنل فارن سیکرٹری برائے افغانستان و مغربی ایشیا سید علی اسد گیلانی نے ان کا استقبال کیا، اس موقع پر دونوں ممالک کے درمیان سفارتی تعلقات کی اہمیت کو اجاگر کیا گیا۔

ذرائع کے مطابق نائب وزیراعظم اور وزیر خارجہ اسحاق ڈار کی دعوت پر 29 اور 30 مارچ کو ہونے والے اس اہم اجلاس میں سعودی عرب، ترکیہ، مصر اور پاکستان کے وزرائے خارجہ شرکت کریں گے، جہاں مشرق وسطیٰ کی صورتحال، ایران سے متعلق پیش رفت اور خطے میں بڑھتی کشیدگی پر تفصیلی غور کیا جائے گا۔

سفارتی ذرائع کا کہنا ہے کہ اجلاس میں علاقائی سیکیورٹی، امن کے قیام، باہمی تعاون کے فروغ اور مشترکہ حکمت عملی تشکیل دینے پر توجہ دی جائے گی، جبکہ ایران سے متعلق حالیہ پیش رفت اور ممکنہ جنگ بندی کے امکانات بھی زیر بحث آئیں گے۔

ماہرین کے مطابق یہ اجلاس ایسے وقت میں ہو رہا ہے جب مشرق وسطیٰ میں کشیدگی میں اضافہ دیکھنے میں آ رہا ہے، اس لیے چار فریقی مشاورت کو خطے میں استحکام کے لیے ایک اہم پیش رفت قرار دیا جا رہا ہے، اور اس سے مشترکہ سفارتی حکمت عملی سامنے آنے کی توقع ہے۔