کشمیر جلد آزادی کی صبح دیکھے گا: فیلڈ مارشل سید عاصم منیر کا مظفرآباد میں بھارت کو دو ٹوک پیغام

یوتھ ویژن نیوز : (محمد عباس سے) مظفرآباد: چیف آف ڈیفنس فورسز فیلڈ مارشل سید عاصم منیر نے کہا ہے کہ کشمیر جلد آزادی کی صبح دیکھے گا اور پاکستان کشمیریوں کے حقِ خودارادیت کے لیے ہر عالمی فورم پر اپنی آواز بلند کرتا رہے گا۔

آئی ایس پی آر (ISPR) کے مطابق فیلڈ مارشل نے مظفرآباد کا اہم دورہ کیا، جہاں یادگارِ شہدائے جموں و کشمیر پر حاضری دی اور شہداء کی عظیم قربانیوں کو سلام عقیدت پیش کیا۔ کور کمانڈر راولپنڈی نے ان کا استقبال کیا۔

پاکستانی افواج کا غیر متزلزل عزم: کشمیری عوام کی سیاسی و سفارتی حمایت جاری رکھنے کا اعادہ

فیلڈ مارشل نے اپنے خطاب میں واضح کیا کہ بھارتی مظالم کشمیریوں کے جذبۂ آزادی کو سرد نہیں کر سکتے۔ انہوں نے کہا کہ مسئلہ کشمیر کا حل صرف اور صرف اقوامِ متحدہ کی قراردادوں کے مطابق ہونا چاہیے۔

لائن آف کنٹرول (LoC) پر تعینات جوانوں کی پیشہ ورانہ صلاحیتوں کی تعریف کرتے ہوئے انہوں نے دو ٹوک الفاظ میں کہا کہ کسی بھی بیرونی جارحیت کا فوری اور بھرپور جواب دیا جائے گا، اور مشکل حالات میں جوانوں کا بلند حوصلہ قوم کا فخر ہے۔