سی ایس ایس 2025 کے امیدواروں کیلئے بڑی خبر، حتمی نتائج کی تاریخ سامنے آگئی۔

یوتھ ویژن نیوز : (محمد عاقب قریشی سے) سی ایس ایس 2025 کے حتمی نتائج کب آئیں گے؟ ایف پی ایس سی نے فروری کے آخری ہفتے میں رزلٹ جاری کرنے کا فیصلہ کر لیا۔

سی ایس ایس 2025 میں حصہ لینے والے امیدواروں کیلئے ایک نہایت اہم پیش رفت سامنے آئی ہے، کیونکہ فیڈرل پبلک سروس کمیشن (ایف پی ایس سی) نے حتمی نتائج جاری کرنے کے حوالے سے اندرونی طور پر فیصلہ کر لیا ہے۔

ذرائع کے مطابق سی ایس ایس 2025 کے فائنل نتائج آئندہ ماہ فروری کے آخری ہفتے میں جاری کیے جانے کا امکان ہے، جس کیلئے کمیشن کی جانب سے انتظامی اور تکنیکی تیاریاں آخری مراحل میں داخل ہو چکی ہیں۔

ایف پی ایس سی حکام کا کہنا ہے کہ سی ایس ایس 2025 کے تحریری امتحان، طبی معائنے اور نفسیاتی جانچ کے بعد ہونے والے انٹرویوز کا مرحلہ تیزی سے مکمل کیا جا رہا ہے اور اب تک 80 فیصد سے زائد امیدواروں کے انٹرویوز ہو چکے ہیں، جبکہ باقی امیدواروں کے انٹرویوز بھی آئندہ چند روز میں مکمل کر لیے جائیں گے۔ ذرائع کے مطابق تمام مراحل مکمل ہونے کے بعد حتمی میرٹ لسٹ کی تیاری کا عمل شروع کیا جائے گا، جس کے بعد نتائج جاری کر دیے جائیں گے۔

مزید یہ بھی بتایا گیا ہے کہ رواں سال سی ایس ایس میں کامیابی کی مجموعی شرح انتہائی کم رہنے کا امکان ہے، جو تقریباً اڑھائی فیصد کے قریب ہو سکتی ہے، جس نے ایک بار پھر اس امتحان کی سختی اور معیار کو نمایاں کر دیا ہے۔

واضح رہے کہ سی ایس ایس 2025 کے تحریری امتحانات میں ملک بھر سے ہزاروں امیدواروں نے شرکت کی تھی، تاہم ان میں سے صرف 2.77 فیصد امیدوار تحریری مرحلہ کامیابی سے عبور کر سکے تھے، جن کے نتائج 22 اگست 2025 کو جاری کیے گئے تھے۔ حتمی نتائج کے اعلان کے بعد کامیاب امیدواروں کی مختلف گروپس اور سروسز میں تقرری کا عمل شروع کیا جائے گا، جس کا امیدوار شدت سے انتظار کر رہے ہیں، کیونکہ سی ایس ایس امتحان کو پاکستان کے مشکل ترین اور معتبر ترین مقابلے کے امتحانات میں شمار کیا جاتا ہے۔