نیوزی لینڈ مسجد حملہ: پاکستانی نژاد سمیت دو افراد کو بہادری کا اعلیٰ ترین ایوارڈ
ویلنگٹن۔( واصب ابراہیم غوری سے ):نیوزی لینڈ کے شہر کرائسٹ چرچ میں مارچ 2019 میں سفیدفاموں کی بالادستی کے ایک مسلح حامی کی جانب سے مسجد پر کیے گئے حملے کے دوران اپنی جان پر کھیل کر دوسروں کو بچانے کے لیے پاکستانی نژاد نعیم راشد اور افغان نژاد عبدالعزیز کو نیوزی لینڈ کے بہادری کے اعلیٰ ترین اعزاز ’’نیوزی لینڈ کراس‘‘ کے لیے منتخب کیا گیا ہے۔
اس حملے میں 51 نمازی شہید ہوگئے تھے۔جرمن نشریاتی ادارے کے مطابق یہ اعزاز مارچ 2019 میں نیوزی لینڈ کے شہر کرائسٹ چرچ میں واقع مسجد پر دہشت گردانہ حملے کے دوران سفیدفاموں کی بالادستی کے ایک مسلح حامی کا مقابلہ کرنے پر دیئے گئے ہیں۔
اس حملے کے دوران دوسروں کی جان بچانے کی کوشش میں پاکستانی نژاد نعیم راشد بھی مارے گئے تھے۔ انہیں اور ایک دیگر شخص عبدالعزیز کو فائرنگ کے دوران انتہائی خطرناک صورت حال کے باوجود بہادری اور انتہائی شجاعت کا مظاہر ہ کرنے کے لیے ملک کے اعلی ترین اعزاز نیوزی لینڈ کراس سے نوازا گیا ہے۔
نیوزی لینڈ کی وزیر اعظم جسینڈ آرڈرن نے اعزاز کا اعلان کرتے ہوئے کہا کہ یہ تمغہ اس سے قبل اب تک صرف دو بار دیا گیا ہے۔ اور یہ نیوزی لینڈ کے اعلی ترین فوجی اعزاز وکٹوریا کراس کا غیر عسکری مساوی اعزاز ہے۔2پولیس افسران سمیت 8 افراد کو بھی بہادری کے تمغے دیئے گئے ہیں جنہوں نے بندوق بردار حملہ آور برینٹن ٹیرنٹ کو اس وقت پکڑ لیا جب وہ ایک کار میں جائے وقوعہ سے فرار ہونے کی کوشش کر رہا تھا۔
جیسنڈا آرڈرن نے کہا کہ اعزاز پانے والوں کی بہادری نے شاید ہلاکتوں کی تعداد کو زیادہ ہونے سے روکا تھا۔ انہوں نے کہا کہ نیوزی لینڈ کے ان باشندوں نے جس جرات کا مظاہرہ کیا وہ بے لوث اور غیر معمولی تھا اور اس کے لیے ہم ان کے مشکور ہیں۔پاکستانی نژاد نعیم راشد کی بیوہ امبرین نعیم نے میڈیا سےگفتگو کرتے ہوئے کہا کہ ان کے شوہر نے پوری زندگی دوسروں کو اپنے اوپر ترجیح دی۔ وہ ایک بہادرشخص تھے، بہت رحم دل اور محبت کرنے والے تھے۔ وہ اسلام کے حقیقی پیروکار تھے۔
انہوں نے کہا کہ یہ اعزاز نفرت کے خلاف کھڑا ہوجانے والے ہر امن پسند شخص کے لیے ہے۔ یہ دہشت گردی کے تمام متاثرین کے لیے ہے۔ صرف کرائسٹ چرچ کے دہشت گردانہ حملے کے متاثرین کے لیے ہی نہیں بلکہ پوری دنیا میں دہشت گردی سے متاثرین کے لیے بھی ہے۔یہ اعزاز آئندہ سال کے آغاز میں ہونے والی ایک تقریب میں پیش کیا جائے گا۔
