خواتین کا معاشی بااختیار ہونا مساوات نہیں بلکہ پاکستان کی پائیدار ترقی کی سٹریٹجک ضرورت ہے، چیئرمین سینیٹ یوسف رضا گیلانی

یوتھ ویژن نیوز : (محمد عاقب قریشی سے) چیئرمین سینیٹ یوسف رضا گیلانی کا کہنا ہے کہ خواتین کا معاشی بااختیار ہونا پاکستان کی پائیدار ترقی کے لیے ایک سٹریٹجک ضرورت ہے۔

اسلام آباد: چیئرمین سینیٹ سید یوسف رضا گیلانی نے کہا ہے کہ خواتین کا معاشی بااختیار ہونا محض صنفی مساوات کا معاملہ نہیں بلکہ پاکستان کی پائیدار ترقی، معاشی استحکام اور سماجی خوشحالی کے لیے ایک سٹریٹجک ضرورت بن چکا ہے۔ انہوں نے واضح کیا کہ کسی بھی ملک کی ترقی اس وقت تک ممکن نہیں جب تک اس کی نصف آبادی کو قومی معیشت، فیصلہ سازی اور ترقیاتی عمل میں مؤثر کردار ادا کرنے کا موقع نہ دیا جائے۔

چیئرمین سینیٹ اسلام آباد کے ایک مقامی ہوٹل میں منعقدہ چوتھی آل پاکستان ویمن چیمبرز پریذیڈنٹس انٹرنیشنل کانفرنس سے بطور مہمانِ خصوصی خطاب کر رہے تھے۔ انہوں نے کہا کہ یہ کانفرنس محض کاروباری رہنماؤں کا اجتماع نہیں بلکہ ایک ایسی قومی تحریک کی نمائندگی کرتی ہے جس کا مقصد خواتین کو پاکستان کی معاشی تبدیلی کی کلیدی معمار کے طور پر تسلیم کرنا ہے۔

مزید یہ بھی : چیئرمین سینیٹ یوسف رضا گیلانی کا پارلیمانی سفارت کاری پر زور

چیئرمین سینیٹ سید یوسف رضا گیلانی نے خواتین کاروباری شخصیات کی جرات، حوصلے اور عزم کو سراہتے ہوئے کہا کہ یہ خواتین سماجی، ثقافتی اور ساختی رکاوٹوں کے باوجود دقیانوسی تصورات کو توڑ رہی ہیں اور تجارت و صنعت کے شعبوں میں نئے مواقع پیدا کر رہی ہیں۔ ان کا کہنا تھا کہ خواتین کی یہ جدوجہد نہ صرف معیشت بلکہ مجموعی سماجی سوچ میں بھی مثبت تبدیلی لا رہی ہے۔

انہوں نے گزشتہ چند برسوں میں خواتین کے معاشی کردار میں ہونے والی پیش رفت کا حوالہ دیتے ہوئے کہا کہ ملک بھر میں 30 سے زائد ویمن چیمبرز آف کامرس اینڈ انڈسٹری کا قیام اس بات کا ثبوت ہے کہ خواتین کے کردار کے حوالے سے قومی سوچ میں بنیادی تبدیلی آ چکی ہے۔ تاہم انہوں نے اس امر پر زور دیا کہ اب اس سفر کو محض اداروں کے قیام تک محدود رکھنے کے بجائے عملی نتائج کی جانب لے جانا ہو گا۔

چیئرمین سینیٹ نے کہا کہ ویمن چیمبرز کو مضبوط، پیشہ ورانہ اور منظم اداروں کی شکل دینا وقت کی اہم ضرورت ہے تاکہ یہ چیمبرز کاروبار، جدت، سرمایہ کاری اور روزگار کے مواقع پیدا کرنے میں مؤثر کردار ادا کر سکیں۔ ان کے مطابق خواتین کی قیادت میں چلنے والے کاروباری نیٹ ورکس ملکی معیشت کے لیے نئی راہیں ہموار کر سکتے ہیں۔

اس موقع پر چیئرمین سینیٹ نے شہید محترمہ بینظیر بھٹو کو زبردست خراجِ عقیدت پیش کرتے ہوئے انہیں خواتین کو بااختیار بنانے کی علمبردار قرار دیا۔ انہوں نے کہا کہ محترمہ بینظیر بھٹو کا وژن آج بھی پاکستان کی خواتین کے لیے مشعلِ راہ ہے اور ان کی پالیسیاں عملی طور پر خواتین کی زندگیوں میں مثبت تبدیلی کا باعث بنیں۔

سید یوسف رضا گیلانی نے محترمہ بینظیر بھٹو کی تاریخی خدمات کا ذکر کرتے ہوئے کہا کہ خواتین اسٹڈیز سینٹرز کا قیام، فرسٹ ویمن بینک کا آغاز، سرکاری ملازمتوں میں خواتین کے لیے کوٹہ سسٹم، اور لیڈی ہیلتھ ورکرز پروگرام جیسے اقدامات ان کی دوراندیش قیادت کا واضح ثبوت ہیں۔ انہوں نے کہا کہ بینظیر بھٹو کا پختہ یقین تھا کہ کوئی بھی قوم اس وقت تک اپنی مکمل صلاحیت حاصل نہیں کر سکتی جب تک خواتین کو معاشی اور سماجی زندگی سے باہر رکھا جائے۔

چیئرمین سینیٹ نے بطور اسپیکر قومی اسمبلی، وزیر اعظم پاکستان اور اب چیئرمین سینیٹ اپنی طویل عوامی خدمات کا حوالہ دیتے ہوئے کہا کہ خواتین کی شمولیت جمہوری اداروں کو مضبوط بناتی ہے اور ترقی کے عمل کو تیز کرتی ہے۔ انہوں نے زور دیا کہ خواتین کو تعلیم، روزگار، کاروبار اور فیصلہ سازی میں مساوی مواقع فراہم کر کے ہی پاکستان کو حقیقی معنوں میں ترقی کی راہ پر ڈالا جا سکتا ہے۔