وزیراعظم شہباز شریف سے یورپی یونین کے سفیر کی ملاقات، جی ایس پی پلس سکیم کے ذریعے تجارت کے فروغ پر زور

یوتھ ویژن نیوز : (علی رضا ابراہیم سے) اسلام آباد (29 جنوری): وزیر اعظم محمد شہباز شریف سے یورپی یونین کے پاکستان میں سفیر رائمونڈاس کاروبلس نے جمعرات کو اہم ملاقات کی، جس میں باہمی دلچسپی کے تمام شعبوں، خصوصاً تجارت، سرمایہ کاری، ترقی، سلامتی، مائیگریشن اور موسمیاتی تبدیلی میں تعاون کو مزید مضبوط بنانے پر تبادلہ خیال کیا گیا۔ ملاقات میں نائب وزیراعظم و وزیر خارجہ سینیٹر محمد اسحاق ڈار، وزیراعظم کے مشیر ڈاکٹر سید توقیر شاہ، وزیر اعظم کے معاون خصوصی طارق فاطمی اور سیکرٹری خارجہ آمنہ بلوچ بھی موجود تھے۔

وزیراعظم شہباز شریف نے ملاقات کے دوران پاکستان اور یورپی یونین کے درمیان باہمی مفاد پر مبنی تجارتی تعلقات کو مستحکم کرنے پر زور دیا، خاص طور پر جی ایس پی پلس سکیم کے تحت تجارت کے فروغ کو اہم قرار دیا۔ انہوں نے کہا کہ حکومت پاکستان یورپی یونین کے ساتھ قریبی تعاون کے لیے پرعزم ہے تاکہ دونوں طرف سے تجارتی سرگرمیوں کو بڑھایا جا سکے اور سرمایہ کاری کے مواقع کو فروغ دیا جا سکے۔

وزیراعظم شہباز شریف سے گیٹس فاؤنڈیشن کے صدر کرس ایلیاس کی ملاقات، پاکستان سے پولیو کے خاتمے کے عزم کا اعادہ

شہباز شریف نے یورپی یونین کے سفیر کا پاکستان میں پرتپاک استقبال کرتے ہوئے خیرمقدم کیا اور کہا کہ پاکستان ہر شعبے میں یورپی یونین کے ساتھ تعاون کو مزید مستحکم بنانے کے لیے پُرعزم ہے۔ انہوں نے اس بات پر بھی زور دیا کہ جی ایس پی پلس سکیم پاکستان-یورپی یونین تجارتی تعلقات میں کلیدی کردار ادا کرتی ہے اور اس کے ذریعے دونوں ممالک کے درمیان باہمی مفاد پر مبنی تجارتی اقدامات کو فروغ دیا جا سکتا ہے۔

وزیراعظم نے گزشتہ برس نومبر میں برسلز میں منعقد ہونے والے پاکستان-یورپی یونین سٹریٹجک ڈائیلاگ کے ساتویں دور پر بھی اطمینان کا اظہار کیا، جس میں پاکستانی وفد کی قیادت نائب وزیراعظم و وزیر خارجہ سینیٹر محمد اسحاق ڈار نے کی تھی۔ اس موقع پر یورپی یونین کے سفیر نے پاکستان میں وزیراعظم کے پرتپاک استقبال پر تشکر کا اظہار کیا اور یقین دلایا کہ وہ پاکستان اور یورپی یونین کے تعلقات کو تمام شعبوں میں مزید مستحکم بنانے کے لیے بھرپور کردار ادا کریں گے۔

یورپی یونین کے سفیر نے بتایا کہ اپریل میں پہلا یورپی یونین-پاکستان بزنس فورم منعقد کیا جائے گا، جس کا مقصد دونوں ممالک کے درمیان تجارتی روابط کو مزید فروغ دینا اور باہمی تعاون کو مضبوط کرنا ہے۔ انہوں نے وزیراعظم کے لیے یورپی یونین قیادت کی جانب سے نیک تمناؤں کا پیغام بھی پہنچایا اور کہا کہ جی ایس پی پلس سکیم کے ذریعے تجارت کے فروغ کے ساتھ ساتھ تجارتی سرگرمیوں میں قریبی روابط کو یقینی بنایا جائے گا۔