اے آئی ٹیکنالوجی میں بڑی پیش رفت: اوپن اے آئی نے چیٹ جی پی ٹی 5.4 لانچ کردیا
یوتھ ویژن نیوز : (ٹیک ذرائع) اوپن اے آئی نے چیٹ جی پی ٹی 5.4 متعارف کرا دیا، نیا اے آئی ماڈل بہتر کوڈنگ، منطق اور پیشہ ورانہ کاموں کیلئے جدید صلاحیتیں فراہم کرتا ہے۔
سان فرانسسکو: مصنوعی ذہانت کی معروف امریکی کمپنی اوپن اے آئی نے پیشہ ورانہ اور پیچیدہ نوعیت کے کاموں کے لیے چیٹ جی پی ٹی کا نیا طاقتور ورژن 5.4 متعارف کرا دیا ہے، جسے جدید منطق، کوڈنگ اور ورک فلو صلاحیتوں کے ساتھ تیار کیا گیا ہے۔
خبر رساں ادارے شنہوا کے مطابق کمپنی نے جمعرات کو اس نئے ماڈل کی باضابطہ ریلیز کا اعلان کیا۔ کمپنی کا کہنا ہے کہ نیا ماڈل سابقہ ورژن GPT‑5.3 Codex کی بنیاد پر مزید بہتر بنایا گیا ہے تاکہ پیچیدہ پیشہ ورانہ کام زیادہ مؤثر انداز میں انجام دیے جا سکیں۔
اوپن اے آئی کا ’ریڈ کوڈ‘ اعلان: GPT-5.2 کی قبل از وقت لانچ کی تیاری
کمپنی نے اس کے ساتھ چیٹ جی پی ٹی 5.4 پرو بھی متعارف کرایا ہے، جسے خاص طور پر اعلیٰ سطح کے پیشہ ورانہ اور تکنیکی کاموں کے لیے زیادہ طاقتور ورژن قرار دیا جا رہا ہے۔
اوپن اے آئی کے مطابق نیا ماڈل اسپریڈشیٹس، پریزنٹیشنز اور دستاویزات کے ساتھ کام کرنے میں بہتر کارکردگی فراہم کرتا ہے اور صارفین کو اپنے پیشہ ورانہ امور زیادہ مؤثر انداز میں مکمل کرنے میں مدد دیتا ہے۔ رپورٹ کے مطابق اس ورژن میں بڑے سیاق و سباق کو سمجھنے کی صلاحیت کو بھی بہتر بنایا گیا ہے جبکہ ویب سرچ کے ساتھ مضبوط انضمام شامل کیا گیا ہے۔
اس ماڈل میں شامل تھنکنگ فیچر صارف کو جواب دینے سے پہلے اس کی منطقی وضاحت دیکھنے کی سہولت دیتا ہے اور اس دوران صارف ہدایات میں تبدیلی بھی کر سکتا ہے۔ مزید یہ کہ نیا ماڈل اسکرین شاٹس سے انٹرفیس کے مختلف عناصر کو پہچاننے کی صلاحیت رکھتا ہے اور بعض سافٹ ویئر میں ماؤس اور کی بورڈ کے ذریعے بنیادی آپریشنز بھی انجام دے سکتا ہے۔
بنچ مارک ٹیسٹ کے نتائج کے مطابق چیٹ جی پی ٹی 5.4 نے اپنے پچھلے ماڈلز کے مقابلے میں نمایاں کارکردگی دکھائی ہے۔ جی ڈی پی ویل موازنہ ٹیسٹ میں اس نے 83 فیصد کیسز میں صنعتی ماہرین کے برابر یا ان سے بہتر نتائج دیے جبکہ کوڈنگ کے امتحانات میں بھی اس نے اپنے پیشرو سے زیادہ اسکور حاصل کیے۔
کمپنی کے مطابق یہ نیا ماڈل حقائق کے اعتبار سے زیادہ درست ہے اور اس میں غلط معلومات پیدا ہونے کے امکانات پہلے کے مقابلے میں کم کر دیے گئے ہیں۔
اوپن اے آئی نے بتایا کہ چیٹ جی پی ٹی 5.4 اس وقت پرو، ٹیم اور پلس صارفین کے لیے دستیاب ہے جبکہ ڈویلپرز اسے اے پی آئی کے ذریعے بھی استعمال کر سکتے ہیں۔ کمپنی نے یہ بھی عندیہ دیا ہے کہ آنے والے مہینوں میں موجودہ تھنکنگ ورژن کو مرحلہ وار ختم کر دیا جائے گا۔
