مقامی مارکیٹ میں سونے کی قیمتوں کو پر لگ گئے، ایک ہفتے میں ہزاروں روپے کا غیر معمولی اضافہ

یوتھ ویژن نیوز : (عمراسحاق چشتی سے) پاکستان کی مقامی صرافہ مارکیٹ میں سونے کی قیمتوں میں ہفتہ وار بنیاد پر نمایاں اور غیر معمولی اضافہ ریکارڈ کیا گیا ہے، جس کے باعث سونا ایک بار پھر تاریخی بلند سطح کے قریب پہنچ گیا ہے۔

ذرائع کے مطابق موجودہ ہفتے کے دوران فی تولہ سونے کی قیمت میں مجموعی طور پر 8 ہزار 600 روپے کا اضافہ ہوا، جس کے بعد فی تولہ سونا 4 لاکھ 81 ہزار 862 روپے کی سطح پر بند ہوا، جو گزشتہ ہفتے کے مقابلے میں ایک بڑا اضافہ تصور کیا جا رہا ہے۔

یہ بھی پڑھیں : سونے کی قیمت نئی بلند ترین سطح پر، ایک سال میں تاریخی اضافہ

اس سے قبل گزشتہ ہفتے مقامی مارکیٹ میں ایک تولہ سونے کی قیمت 4 لاکھ 73 ہزار 262 روپے پر بند ہوئی تھی، جبکہ دس گرام سونے کی قیمت 4 لاکھ 13 ہزار 118 روپے رہی تھی، تاہم رواں ہفتے قیمتوں میں آنے والے اچانک اضافے نے خریداروں اور سرمایہ کاروں دونوں کو حیران کر دیا ہے۔ صرافہ ایسوسی ایشن کے مطابق ملک میں سونے کی قیمتوں میں ہفتہ وار اضافے کی بنیادی وجہ عالمی مارکیٹ میں قیمتی دھات کی قیمتوں میں تیزی ہے، جہاں موجودہ ہفتے کے دوران سونا 4 ہزار 595 ڈالر فی اونس کی بلند سطح پر ٹریڈ کرتا رہا۔

ماہرین کا کہنا ہے کہ عالمی سطح پر مہنگائی کے خدشات، امریکی ڈالر میں اتار چڑھاؤ، جغرافیائی سیاسی کشیدگی اور سرمایہ کاروں کا محفوظ سرمایہ کاری کے طور پر سونے کی جانب رجحان قیمتوں میں اضافے کی بڑی وجوہات ہیں، جس کے اثرات براہِ راست پاکستانی مارکیٹ پر بھی مرتب ہو رہے ہیں۔ صرافہ بازار سے وابستہ تاجروں کے مطابق اگر عالمی مارکیٹ میں یہی رجحان برقرار رہا تو آئندہ دنوں میں مقامی سطح پر سونے کی قیمتیں مزید بڑھنے کا امکان بھی رد نہیں کیا جا سکتا، جس سے شادی بیاہ اور زیورات کی خریداری متاثر ہونے کا خدشہ ہے۔

دوسری جانب شہریوں کا کہنا ہے کہ سونے کی قیمتوں میں مسلسل اضافے کے باعث عام آدمی کیلئے زیورات کی خریداری مشکل سے مشکل تر ہوتی جا رہی ہے، جبکہ سرمایہ کار طبقہ اس اضافے کو منافع بخش قرار دے رہا ہے۔ معاشی ماہرین کے مطابق عالمی مارکیٹ میں سونے کی قیمتوں میں استحکام یا کمی کے بغیر مقامی سطح پر قیمتوں میں نمایاں کمی کا امکان کم ہے، جس کے باعث آنے والے ہفتوں میں سونے کی قیمتیں ملکی معیشت اور صارفین کیلئے ایک اہم موضوع بنی رہیں گی۔