شوبز انڈسٹری میں اپنا ایک منفرد نام اور مقام بنانا چاہتی ہوں۔ماڈل و اداکارہ رومیسہ ذوالفقار

اسلام آباد (ایف نعیم مردانوی)شوبز انڈسٹری میں اپنا ایک منفرد نام اور مقام بنانا چاہتی ہوں اور میں نے شہرت کے بجائے اپنی ساری سوچ اور دھیان اپنی اداکاری پہ مرکوز رکھا ہوا ہے۔اِن خیالات کا اظہار نیشنل اکیڈمی آف پرفارمنگ آرٹ (ناپا) سے اداکاری کے شعبے میں ڈپلومہ کرنے والی نئی اُبھرتی ہوئی ماڈل و اداکارہ رومیسہ ذوالفقار نے روزنامہ یوتھ ویژن سے خصوصی گفتگو کرتے ہوئے کیا۔ انہوں نے مزید کہا کہ میں اپنی محنت اور لگن سے کامیابی کی سیڑھی پر چڑھتے ہوئے کامیاب ہونا چاہتی ہوں۔

اور اپنے کام کے ذریعے سے اپنا الگ ایک مقام بنانا چاہتی ہوں تا کہ لوگ مجھے میرے کام کے حوالے سے پہچانے اور مجھے راتوں رات سُپر سٹار بننے کا کوئی ارادہ نہیں کیونکہ ابھی میں بہت کچھ سیکھ رہی ہوں۔انہوں نے مزید بتایا کہ میں اِس وقت مختلف برانڈز کے کمرشلز میں مصروف ہوں جبکہ کئی تھیٹر پلیزمیں بھی کام کرچکی ہوں اور اِس کے علاوہ اے آر وائی ٹی وی چینل سے نشر ہونے والا ڈرامہ سیریل ”عشقیہ“ اور ٹی وی ون چینل سے نشر ہونے والا ڈرامہ سیریل ”راک سٹار“ میں اپنے فن اداکاری کا مظاہرہ کرچکی ہوں جسے شائقین کی طرف سے بھرپور پذیرائی ملی جس کیلئے میں تہہ دل سے مشکور ہوں۔ماڈل و اداکارہ رومیسہ ذوالفقار نے مزید بات چیت کرتے ہوئے بتایا کہ میں اِس وقت این ڈی پروڈکشن کے بینر تلے بننے والی فلم ”فنکار“ میں بھی مرکزی کردار میں جلوہ گر ہورہی ہوں جو بہت جلد سینما گھروں کی زینت بنے گی۔انہوں نے کہا کہ اب زمانہ بدل چکا ہے اور اِس وقت پڑھے لکھے ماحول میں کام ہورہا ہے۔اِن کا کہنا تھا کہ مجھے شوبز انڈسٹری میں آئے ہوئے بہت کم عرصہ ہوا ہے لیکن اپنی محنت اور اپنے کام سے اپنے آپ کو اِس شعبے میں منوایا ہے۔