دوسری شادی کرنے پر پہلی بیوی نے شوہر کو اغوا کر لیا
صنعا (نبیلہ اکبر سے ) یمن میں خاتون نے دوسری شادی کرنے پر شوہر کو اغوا کر کے بدترین تشدد کا نشانہ بنا ڈالا۔
غیر ملکی خبر رساں ایجنسی کے مطابق یمن کے شہر تعز میں پہلی بیوی نے اپنے شوہر کو دوسری شادی کرنے پر اغوا کر کے سسرالیوں سے تاوان کا مطالبہ کیا۔ اس دوران خاتون نے اپنے ہی شوہر کو بدترین تشدد کا نشانہ بھی بنایا۔
خاتون کو اپنے شوہر کی دوسری شادی کی اطلاع ملی تو غصے میں اس نے انتہا قدم اٹھا لیا۔ شوہر کو گھر میں ہی رسیوں سے باندھ کر بہیمانہ تشدد کا نشانہ بنایا۔
خاتون نے تشدد کے بعد اپنے سسرالیوں سے بھاری تاوان کا مطالبہ بھی کیا اور بھاری رقم وصول کرنے کے بعد شوہر کو نیم مردہ حالت میں رہا کر دیا۔ خاتون نے اپنے شوہر کی تشدد زدہ تصاویر کو سوشل میڈیا پر بھی شیئر کر دیا اور کئی نجی گفتگو بھی شیئر کر دیں۔
واقعے کے بعد پولیس نے خاتون کو گرفتار کر لیا اور دوران حراست خاتون نے جرم کا اعتراف کرتے ہوئے تمام واقعے کی تفصیلات سے آگاہ کر دیا۔ خاتون کا کہنا تھا کہ وہ اپنے شوہر سے بے پناہ محبت کرتی تھی لیکن اس نے اس کی محبت کا صلہ دھوکے سے دیا اور دوسری شادی کر لی۔
