شنگھائی ٹیکسٹائل نمائش 2026 کامیابی سے اختتام پذیر
یوتھ ویژن نیوز : (واصب ابراہیم سے) چین کے شہر شنگھائی میں منعقد ہونے والی عالمی ٹیکسٹائل نمائشیں انٹر ٹیکسٹائل شنگھائی اپیرل فیبرکس اسپرنگ ایڈیشن 2026 اور یارن ایکسپو اسپرنگ 2026 کامیابی کے ساتھ اختتام پذیر ہو گئیں، جہاں دنیا بھر سے ٹیکسٹائل مینوفیکچررز، سپلائرز، ڈیزائنرز اور خریداروں نے بڑی تعداد میں شرکت کی۔ تین روز تک جاری رہنے والی یہ نمائشیں شنگھائی کے نیشنل ایگزیبیشن اینڈ کنونشن سینٹر میں منعقد ہوئیں جن میں ٹیکسٹائل اور ملبوسات کی صنعت میں ہونے والی جدید ترین پیش رفت کو عالمی سطح پر پیش کیا گیا۔
نمائش کے دوران یارن، فیبرکس، ایکسیسریز اور پائیدار ٹیکسٹائل مصنوعات سے متعلق جدید ٹیکنالوجی اور اختراعی حل کو خصوصی طور پر نمایاں کیا گیا۔ عالمی خریداروں اور سپلائرز کے درمیان کاروباری روابط کو مضبوط بنانے کے لیے مختلف سیشنز اور نیٹ ورکنگ مواقع بھی فراہم کیے گئے جس سے صنعت کے مختلف شعبوں کے درمیان تعاون کو فروغ ملا۔
چین نے دوربینوں کا ڈیٹا یکجا کرنے والا AI سسٹم متعارف کروادیا
اس عالمی نمائش میں پاکستان کی چار نمایاں ٹیکسٹائل کمپنیوں نے بھی شرکت کی اور اپنی جدید یارن اور فیبرکس کلیکشنز عالمی خریداروں اور سورسنگ ماہرین کے سامنے پیش کیں۔ پاکستانی نمائش کنندگان نے جدید مصنوعات، اختراعی ٹیکسٹائل ٹیکنالوجی اور پائیدار صنعتی حل متعارف کراتے ہوئے بین الاقوامی خریداروں کی توجہ حاصل کی۔
شرکت کرنے والی پاکستانی کمپنیوں کے نمائندوں کے مطابق اس ایونٹ کے دوران انہیں نہ صرف مثبت کاروباری ردعمل ملا بلکہ عالمی مارکیٹ کے خریداروں کے ساتھ قیمتی روابط قائم کرنے کے مواقع بھی حاصل ہوئے۔ ماہرین کا کہنا ہے کہ اس طرح کی نمائشوں میں شرکت پاکستان کی ٹیکسٹائل صنعت کے لیے عالمی سطح پر اپنی موجودگی کو مضبوط بنانے کا اہم ذریعہ ثابت ہوتی ہے۔
ٹیکسٹائل ماہرین کے مطابق انٹر ٹیکسٹائل شنگھائی اور یارن ایکسپو جیسے عالمی تجارتی پلیٹ فارمز نہ صرف نئی ٹیکنالوجی اور مصنوعات کو متعارف کرانے کا موقع فراہم کرتے ہیں بلکہ مختلف ممالک کی صنعتوں کے درمیان تعاون، جدت اور کاروباری ترقی کو بھی فروغ دیتے ہیں۔
ان نمائشوں کا کامیاب انعقاد اس بات کی عکاسی کرتا ہے کہ عالمی ٹیکسٹائل صنعت میں جدت، پائیداری اور بین الاقوامی شراکت داری کو مزید فروغ دینے کے لیے ایسے ایونٹس انتہائی اہم کردار ادا کرتے ہیں۔
