اسلام آباد ائیرپورٹ پر پروازوں کیلئے نیا نوٹم جاری
یوتھ ویژن نیوز : (محمد عباس سے ) اسلام آباد انٹرنیشنل ایئرپورٹ پر پروازوں کے حوالے سے نیا نوٹم جاری کر دیا گیا ہے جس کے تحت مخصوص وقت کے دوران لینڈنگ اور ٹیک آف عارضی طور پر معطل رہے گی۔ پاکستان ایئر پورٹ اتھارٹی کے مطابق لاہور فلائٹ انفارمیشن ریجن کے چھ سیکٹرز کو سولہ مارچ کے روز عارضی طور پر بند رکھنے کا فیصلہ کیا گیا ہے جس کے باعث اس عرصے میں کمرشل پروازوں کی آمد و رفت متاثر ہو سکتی ہے۔
نوٹم میں بتایا گیا ہے کہ سولہ مارچ کو صبح آٹھ بجے سے ساڑھے دس بجے تک اسلام آباد ائیرپورٹ پر لینڈنگ اور ٹیک آف کی اجازت نہیں ہوگی۔ اس دوران جو طیارے فضا میں موجود ہوں گے انہیں لینڈنگ کے لیے انتظار کرنا پڑ سکتا ہے جبکہ ایئر ٹریفک کو متبادل انتظامات کے ذریعے منظم کیا جائے گا تاکہ پروازوں کی حفاظت اور نظم و ضبط برقرار رکھا جا سکے۔
اسلام آباد میں شنگھائی ماڈل کے تحت ترقی کے اقدامات کا جائزہ
اتھارٹی نے مزید ہدایت جاری کی ہے کہ تمام طیاروں کے کپتان ممکنہ تاخیر کے پیش نظر پرواز کے دوران اضافی ایندھن رکھیں تاکہ کسی بھی ہنگامی یا غیر متوقع صورتحال میں پرواز کو محفوظ طریقے سے سنبھالا جا سکے۔ حکام کے مطابق یہ اقدام فضائی حدود کے مخصوص حصوں میں عارضی پابندی کے باعث کیا گیا ہے اور اس کا مقصد پروازوں کی حفاظت اور فضائی ٹریفک کے موثر انتظام کو یقینی بنانا ہے۔
