وزیراعظم شہباز شریف سے مصنوعی ذہانت کے سرکردہ ماہرین کے اعلیٰ سطحی وفد کی ملاقات

یوتھ ویژن نیوز : ( عفان گوہ نمائدہ خصؤصی برائے ٹیک انفارمیشن سے) وزیر اعظم شہباز شریف نے ڈیجیٹل اور اقتصادی تبدیلی میں عالمی اور اوورسیز پاکستانی ماہرین کی شمولیت پر زور دیا، AI کے فروغ کے لیے اقدامات۔

اسلام آباد: وزیر اعظم پاکستان محمد شہباز شریف نے ڈیجیٹل تبدیلی کے عمل کو تیز کرنے کے لیے عالمی مہارت، خاص طور پر بیرون ملک پاکستانی ماہرین کی شمولیت کی اہمیت پر زور دیا ہے۔ وزیر اعظم نے کہا کہ حکومت قومی و اقتصادی ترقی کے لیے جدید ٹیکنالوجیز کو ترجیحی بنیادوں پر استعمال کر رہی ہے۔

یہ بات وزیر اعظم نے گزشتہ ہفتے برطانیہ کے غیر سرکاری دورے کے دوران مصنوعی ذہانت کے سرکردہ ماہرین کے اعلیٰ سطح وفد سے ملاقات میں کی۔ ملاقات میں عالمی اداروں اور تنظیموں جیسے بلیک راک، یونیورسٹی آف کیمبرج، یونیورسٹی آف آکسفورڈ، ڈیلویٹ اور دنیا کی معروف AI و ٹیکنالوجی کمپنیوں کے سینئر رہنما شامل تھے۔ پاکستان ورچوئل ایسٹس ریگولیٹری اتھارٹی (پی وی اے آر اے) کے چیئرمین بلال بن ثاقب بھی ملاقات میں موجود تھے۔

وزیر اعظم نے کہا کہ مصنوعی ذہانت جیسی ابھرتی ہوئی ٹیکنالوجیز کو قومی ترجیحات، ادارہ جاتی صلاحیتوں اور جامع ترقی کے مقاصد کے ساتھ ہم آہنگ ہونا چاہیے۔ انہوں نے اس بات پر بھی زور دیا کہ نجی شعبے سے شراکت داری عوامی خدمات کی فراہمی کو بہتر بنانے میں کلیدی کردار ادا کر سکتی ہے۔

وفد کے اراکین نے پاکستان میں AI کے عملی استعمال اور مختلف اہم چیلنجز سے نمٹنے کے طریقوں پر گفتگو کی۔ وزیر مملکت بلال بن ثاقب نے کہا کہ مصنوعی ذہانت اب پاکستان کے لیے مستقبل نہیں بلکہ حال کا سنہری موقع ہے، اور حکومت اس حوالے سے ٹھوس اقدامات کر رہی ہے۔

وزیر اعظم کی اس ملاقات نے پاکستان کی وسیع حکمت عملی کی عکاسی کی، جس کا مقصد ڈیجیٹل تبدیلی، جدت طرازی، اور ٹیکنالوجی سے چلنے والی عوامی پالیسی کے لیے بین الاقوامی ادارہ جاتی شراکت داروں کو شامل کرنا ہے۔