پاکستان میں شعبان المعظم کا چاند نظر نہیں آیا، مرکزی رویت ہلال کمیٹی کا باضابطہ اعلان

یوتھ ویژن نیوز : (قاری عاشق حُسین سے) پاکستان میں شعبان المعظم کا چاند نظر نہیں آیا، مرکزی رویت ہلال کمیٹی کے مطابق یکم شعبان 21 جنوری بروز بدھ ہو گی۔

اسلام آباد: پاکستان میں شعبان المعظم 1447 ہجری کے چاند کی رویت کے حوالے سے مرکزی رویت ہلال کمیٹی نے باضابطہ اعلان کرتے ہوئے کہا ہے کہ ملک کے کسی بھی حصے سے شعبان کا چاند نظر آنے کی مستند شہادت موصول نہیں ہوئی۔ اس فیصلے کے بعد ماہ رجب کے تیس دن مکمل کیے جائیں گے اور یکم شعبان المعظم 21 جنوری بروز بدھ کو ہو گی۔

شعبان کا چاند دیکھنے کے لیے مرکزی رویت ہلال کمیٹی کا اجلاس وفاقی دارالحکومت اسلام آباد میں منعقد ہوا، جس کی صدارت چیئرمین مرکزی رویت ہلال کمیٹی مولانا محمد عبد الخبیر آزاد نے کی۔ اجلاس میں وزارت مذہبی امور، وزارت سائنس و ٹیکنالوجی، سپارکو اور دیگر متعلقہ اداروں کے اعلیٰ حکام نے شرکت کی۔

شعبان کا چاند دیکھنے کیلئے مرکزی رویت ہلال کمیٹی کا اجلاس

ملک کے مختلف حصوں میں زونل رویت ہلال کمیٹیوں کے اجلاس بھی منعقد کیے گئے، جن میں کراچی، لاہور، کوئٹہ اور پشاور شامل ہیں۔ ان اجلاسوں میں بھی چاند کی رویت کے حوالے سے موصول ہونے والی اطلاعات، موسمی صورتحال اور مقامی مشاہدات کا جائزہ لیا گیا۔

مرکزی رویت ہلال کمیٹی کے مطابق مختلف علاقوں سے موصول ہونے والی شہادتوں اور سائنسی رپورٹس کا تفصیلی تجزیہ کیا گیا، تاہم کوئی بھی اطلاع شرعی معیار پر پورا نہ اتر سکی۔ سپارکو کی جانب سے پیش کی گئی فلکیاتی رپورٹ کے مطابق غروب آفتاب کے وقت چاند کی عمر اور رویت کے امکانات محدود تھے، جس کے باعث چاند نظر آنے کی تصدیق ممکن نہ ہو سکی۔

اجلاس کے اختتام پر چیئرمین رویت ہلال کمیٹی مولانا عبد الخبیر آزاد نے اعلان کرتے ہوئے کہا کہ رویت ہلال کے تمام فیصلے متفقہ مشاورت، شرعی اصولوں اور سائنسی معاونت کی بنیاد پر کیے جاتے ہیں، تاکہ عوام میں کسی قسم کا ابہام یا اختلاف پیدا نہ ہو۔

مذہبی حلقوں کے مطابق شعبان المعظم اسلامی تقویم کا ایک اہم مہینہ ہے، جس میں رمضان المبارک کی تیاری، عبادات اور دینی سرگرمیوں میں اضافہ کیا جاتا ہے۔ مرکزی رویت ہلال کمیٹی کے اعلان کے بعد ملک بھر میں مساجد اور مذہبی اداروں میں شعبان المعظم کی مناسبت سے مذہبی سرگرمیوں کا آغاز متوقع ہے۔