کرونا کیخلاف جنگ میں پاکستان کی کارکردگی دنیا کیلئے مثال بن گئی

اسلام آباد-(ثاقب ابراہیم غوی سے ) کرونا کیخلاف جنگ میں پاکستان کی کارکردگی دنیا کیلئے مثال بن گئی، ملک میں 15 کروڑ سے زائد افراد کو کرونا ویکسین لگا دی گئی، گزشتہ 24 گھنٹوں کے دوران ریکارڈ 13 لاکھ سے زائد افراد نے اپنی ویکسی نیشن کروائی۔ تفصیلات کے مطابق وزارت نیشنل ہیلتھ سروسز ریگولیشنز اینڈ کوآرڈینیشن کی جانب سے فراہم کردہ اعداد و شمار کے مطابق ملک بھر میں 15 کروڑ19 لاکھ51 ہزار 87 افراد کی کرونا ویکسی نیشن کی جا چکی ہے ۔

گزشتہ 24 گھنٹوں کے دوران بھی ملک میں ریکارڈ تعداد میں لوگوں نے ویکسین لگوائی۔ گزشتہ 24 گھنٹوں کے دوران ملک بھر میں 13 لاکھ 58 ہزار 181افراد کو کرونا وائرس سے تحفظ کی ویکسین لگائی گئی۔

دوسری جانب منگل کو وزارت قومی صحت کی جانب سے جاری اعدادوشمار کے مطابق گزشتہ 24 گھنٹوں کے دوران ملک بھر میں 41 ہزار869 کرونا ٹیسٹ کئے گئے، جن میں سے 291 افراد کے کرونا ٹیسٹ مثبت آئے ہیں۔

اس طرح گزشتہ 24 گھنٹوں میں کئے گئے کورونا ٹیسٹوں کی مثبت کی شرح 0.69 فیصد رہی ہے۔ مزید برآں اس دوران کرونا وائرس کی وجہ سے جاں بحق ہونے والوں کی تعداد3ریکارڈ کی گئی ہے جبکہ 636 مریضوں کی حالت تشویشناک ہے۔ جبکہ ملک میں کرونا وائرس کی اومیکرون قسم کے 75 کیس بھی سامنے آگئے ۔ قومی ادارہ صحت (این آئی ایچ) کے مطابق اومیکرون کی33کیس کراچی سے رپورٹ ہوئے ہیں، اس کے علاوہ 17 کیس اسلام آباد سے اور 13 کیس لاہور سے رپورٹ ہوئے ہیں۔
اومی کرون ویریئنٹ کے 12کیس بیرون ملک سے آنے والے مسافروں سے بھی رپورٹ ہوئے ہیں۔قومی ادارہ صحت کے مطابق پاکستان میں اومیکرون کا پہلا کیس 13دسمبرکو رپورٹ ہوا تھا، ویکسینیشن اور ایس او پیز پر عملدرآمد بھی وبا کے خلاف مؤثر ہیں، تمام شہری کورونا کے خاتمے کیلئے ویکسینیشن مکمل کروائیں۔