حکومت پنجاب مزدور طبقہ کی فلاح وبہبود کے لئے کوشاں ہے۔ لیاقت علی چٹھہ
بہاول پور(عمران منیر قذافی سے): سیکرٹری محکمہ محنت و انسانی وسائل حکومت پنجاب لیاقت علی چٹھہ نے کہا ہے کہ حکومت پنجاب مزدور طبقہ کی فلاح وبہبود کے لئے کوشاں ہے۔ اس سلسلہ میں حکومت پنجاب ویژن کے عین مطابق مزدور طبقہ کو اشیائے ضروریہ کی فراہمی کو یقینی بنانے کے لئے فیئر پرائس شاپ ایکٹ 1971ء پر عملدرآمد سمیت مزدور طبقہ کوحکومت کی جانب سے کم از کم شرح اجرت کی ادائیگی یقینی بنانے کے لئے تمام صنعتی وکمرشل ادارہ جات میں کم از کم شرح اجرت 20ہزار روپے ماہانہ کے آگاہی بورڈز آویزاں کرانے کی ہدایت کر دی گئی ہے۔ان خیالات کا اظہار انہوں نے آج یہاں اپنے ایک بیان میں کیا۔ سیکرٹری محکمہ محنت و انسانی وسائل حکومت پنجاب لیاقت علی چٹھہ نے بتایا کہ مزدور طبقہ کو اشیائے ضروریہ کی فراہمی میں درپیش مشکلات کے ازالہ کے لئے ڈائریکٹر جنرل لیبر ویلفیئر پنجاب ڈاکٹر فیصل ظہور کی سربراہی میں ٹیمیں تشکیل دے دی گئی ہیں جو تمام صنعتی ادارہ جات میں فیکٹری فیئر پرائس شاپ آرڈیننس 1971ء پر عملدرآمد کو یقینی بنائیں گی اور صنعتی ادارہ جات میں کام کرنے والے مزدور طبقہ کو آٹا، چینی اور گھی حکومت کے مقرر کردہ نرخوں پر باآسانی دستیاب ہوں گے۔ انہوں نے مزید بتایا کہ مزدور طبقہ کو کم از کم شرح اجرت کی ادائیگی یقینی بنانے کے لئے کم از کم شرح اجرت 20ہزار روپے ماہانہ بارے آگاہی بورڈز بھی آویزاں کروانے کی ہدایت کی گئی ہے تاکہ مزدور طبقہ کے معاشی حقوق کا تحفظ یقینی بنایا جا سکے۔ اس موقع پر ڈائریکٹر لیبر ویلفیئر بہاو ل پور ڈویژن ملک محمد فاروق نے بتایا کہ متعلقہ قوانین پر عملدرآمد کے لئے فیلڈ افسران مکمل طور پر فعال ہیں اور خلاف ورزی کے مرتکب آجران کے خلاف حسب ضابطہ کاروائی عمل میں لائی جائے گی۔ انہوں نے مزید بتایا کہ آجر حضرات کو مزدور طبقہ کی امداد کے لئے کلیدی کردار ادا کرنا چاہئے تاکہ ان کی زندگی کو سہل بنایا جا سکے اور ملکی صنعتی پیداوار میں اضافہ ہو سکے۔
