سعد رضوی اور انس رضوی کہاں چھپے تھے؟ پولیس نے بڑا انکشاف کر دیا
یوتھ ویژن نیوز : (نمائندہ خصوصی سے): قانون نافذ کرنے والے اداروں نے صرف ایک دن کی روپوشی کے بعد تحریک لبیک پاکستان (ٹی ایل پی) کے رہنماؤں حافظ سعد رضوی اور انس رضوی کا سراغ لگا لیا ہے۔ ذرائع کے مطابق دونوں رہنما اچانک منظرِ عام سے غائب ہو گئے تھے، جس کے بعد پولیس اور خفیہ ادارے متحرک ہو گئے۔ حکام کا کہنا ہے کہ جدید ٹیکنیکل ٹریکنگ اور خفیہ ذرائع کی مدد سے دونوں رہنماؤں کی ممکنہ موجودگی کے مقامات کی نشاندہی کر لی گئی ہے اور ان کی گرفتاری اب محض وقت کی بات ہے۔ پولیس کے مطابق سکیورٹی ادارے مکمل الرٹ ہیں اور کارروائی کے لیے تیار کھڑے ہیں، تاہم ترجیح یہی ہے کہ دونوں رہنما پرامن طور پر خودسپردگی اختیار کریں۔ حکام نے واضح کیا ہے۔
کہ اگر وہ زخمی ہیں تو ریاست انہیں تمام طبی سہولیات فراہم کرے گی، بشرطیکہ وہ خود کو قانون کے حوالے کریں۔ ابھی تک اس بات کی تصدیق نہیں ہو سکی کہ سعد یا انس رضوی زخمی ہیں یا نہیں، تاہم ان کی گرفتاری سے بچنے کی کوشش ایک دن سے زیادہ نہ چل سکی۔ پولیس کے مطابق چھپنے کی کوئی جگہ باقی نہیں رہی، پورا دائرہ تنگ کر دیا گیا ہے اور ہر ممکن قانونی راستہ اختیار کیا جا رہا ہے تاکہ گرفتاری عمل میں لائی جا سکے۔ حکام کا کہنا ہے کہ کارروائی مکمل طور پر قانونی دائرے میں ہوگی، تاہم ریاست کسی صورت قانون سے انحراف یا مزاحمت برداشت نہیں کرے گی۔
پولیس نے عوام کو خبردار کیا ہے کہ اگر کسی نے سعد یا انس رضوی کی مدد یا پناہ دی تو اس کے خلاف بھی سخت قانونی کارروائی کی جائے گی۔ ریاست کی جانب سے نرمی کا دروازہ ابھی تک کھلا رکھا گیا ہے تاکہ کوئی ناخوشگوار صورتحال پیدا نہ ہو، لیکن قانون سے فرار کی اجازت کسی کو نہیں دی جائے گی۔ خفیہ ذرائع کے مطابق دونوں رہنماؤں کے گرد گھیرا مزید تنگ کر دیا گیا ہے اور گرفتاری کے امکانات اب انتہائی قوی ہیں۔ پولیس حکام نے کہا کہ تمام اقدامات آئین و قانون کے مطابق کیے جا رہے ہیں، اور ریاست کا مقصد کسی تصادم کے بغیر معاملے کو حل کرنا ہے۔ اب فیصلہ حافظ سعد رضوی اور انس رضوی کے ہاتھ میں ہے کہ وہ مزاحمت کا راستہ اختیار کرتے ہیں یا خودسپردگی کا — کیونکہ دونوں صورتوں میں انجام اب قریب ہے۔
