خیبرپختونخوا میں حساس کارروائیاں: سیکیورٹی فورسز کا بھارتی پراکسی خوارج پر بڑا وار، 13 دہشتگرد ہلاک
یوتھ ویژن نیوز : (کرائم رپورٹر سُمیر علی خان سے) خیبرپختونخوا میں سیکیورٹی فورسز نے بھارتی سرپرستی میں کام کرنے والے فتنۃ الخوارج کے دہشتگردوں کے خلاف دو انتہائی اہم اور حساس کارروائیاں کرتے ہوئے مجموعی طور پر 13 خوارج کو ہلاک کردیا، جب کہ فورسز نے پورے علاقے میں سرچ، کلیئرنس اور سینیٹائزیشن آپریشن بھی تیز کردیا ہے۔ آئی ایس پی آر کے مطابق پہلی بڑی کارروائی لکی مروت کی تحصیل پہاڑ خیل میں اس وقت کی گئی جب خوارج کی موجودگی اور ان کے منصوبہ بندی مراکز کے حوالے سے خفیہ ذرائع سے مصدقہ معلومات موصول ہوئیں، جس کے بعد قانون نافذ کرنے والے اداروں اور سیکیورٹی فورسز نے مشترکہ طور پر پورے علاقے کو گھیرے میں لیا اور اچانک آپریشن شروع کردیا۔ کارروائی کے دوران دہشتگردوں نے شدید مزاحمت کی اور فائرنگ کا تبادلہ بھی طویل وقت تک جاری رہا، تاہم موثر حکمت عملی اور بروقت رسپانس کے نتیجے میں 10 خوارج موقع پر ہی ہلاک ہوئے، جب کہ فورسز نے علاقے کی مکمل سرچ کے دوران اسلحہ، گولہ بارود اور دہشتگردی میں استعمال ہونے والا متعدد سامان بھی قبضے میں لے لیا۔
آئی ایس پی آر کے مطابق اس کارروائی کے بعد علاقے میں فرار ہونے والے باقی دہشتگردوں کی نشاندہی کے لیے مشترکہ ٹیموں نے مسلسل سینیٹائزیشن آپریشن شروع کیا، تاکہ بھارت کی سرپرستی یافتہ اس نیٹ ورک کی باقی منصوبہ بندی صلاحیت کو بھی ختم کیا جا سکے اور کسی بھی ممکنہ خطرے کا خاتمہ کیا جائے۔
ڈی آئی خان میں دوسری کارروائی
بیان میں کہا گیا ہے کہ اسی سلسلے میں دوسری اہم کارروائی ڈیرہ اسماعیل خان کے ایک علاقے میں اس وقت کی گئی جب دہشتگردوں کے موجود ہونے اور ان کی نقل و حرکت کے بارے میں مستند خفیہ معلومات موصول ہوئیں۔ کارروائی کے دوران سیکیورٹی فورسز نے علاقے کو فوری طور پر سیل کیا اور دہشتگردوں کے ایک گروہ سے فائرنگ کے تبادلے کے بعد 3 دہشتگردوں کو ہلاک کردیا۔
بھارتی سرپرستی کا واضح ثبوت
آئی ایس پی آر کے مطابق ہلاک ہونے والے تمام دہشتگرد براہِ راست بھارت کی جانب سے معاونت، تربیت اور فنڈنگ حاصل کر رہے تھے اور یہ گروہ نہ صرف سیکیورٹی فورسز پر حملوں، بلکہ قانون نافذ کرنے والے اداروں، مسافروں اور بے گناہ شہریوں پر ٹارگٹ کلنگ میں بھی ملوث رہا تھا۔ یہ نیٹ ورک گزشتہ کئی ماہ سے صوبے کے مختلف علاقوں میں دہشتگردی کی کوششوں میں مصروف تھا جسے فورسز نے مؤثر کارروائیوں کے ذریعے ناکام بنا دیا۔
عزمِ استحکام کے تحت کارروائیاں جاری رہیں گی
آئی ایس پی آر نے مزید بتایا کہ عزمِ استحکام کے تحت ملک کے تمام علاقوں میں دہشتگردوں، ان کے سہولت کاروں اور بیرونی سرپرستی میں چلنے والی دہشتگردانہ سرگرمیوں کے خلاف آپریشنز جاری ہیں، جب کہ سیکیورٹی فورسز ہر قیمت پر امن، استحکام اور شہریوں کی تحفظ یقینی بنانے کے لیے پرعزم ہیں۔ بیان میں کہا گیا ہے کہ یہ کارروائیاں اس بات کی واضح علامت ہیں کہ ریاست کسی بھی بھارتی پراکسی گروہ کو پاکستانی سرزمین کو عدم استحکام کے لیے استعمال کرنے کی ہرگز اجازت نہیں دے گی۔
