پاکستان کا ٹی20 ورلڈ کپ 2026 میں شرکت کا حتمی فیصلہ جمعہ یا پیر کو ہوگا، محسن نقوی

یوتھ ویژن نیوز : ( شہزاد چوہدری سے) پاکستان کے ٹی20 ورلڈ کپ 2026 میں شرکت سے متعلق حتمی فیصلہ جمعہ یا پیر کو متوقع ہے۔ یہ بات چیئرمین پاکستان کرکٹ بورڈ (پی سی بی) محسن نقوی نے واضح کی ہے۔ ان کا کہنا ہے کہ اس معاملے پر احتجاج سمیت تمام ممکنہ آپشنز وزیراعظم شہباز شریف کے سامنے رکھ دیے گئے ہیں اور فیصلہ وزیراعظم کی ہدایت کی روشنی میں کیا جائے گا۔

سماجی رابطے کی ویب سائٹ ایکس (سابقہ ٹوئٹر) پر جاری اپنے بیان میں محسن نقوی نے بتایا کہ وزیراعظم شہباز شریف کے ساتھ ایک مفید ملاقات ہوئی ہے، جس میں انہیں آئی سی سی سے متعلق معاملات پر تفصیلی بریفنگ دی گئی۔ چیئرمین پی سی بی کے مطابق وزیراعظم نے تمام پہلوؤں کو سامنے رکھتے ہوئے مسئلے کو حل کرنے کی ہدایت کی ہے۔

اس سے قبل وزیراعظم شہباز شریف اور چیئرمین پی سی بی محسن نقوی کے درمیان ایک اہم ملاقات ہوئی، جس میں ٹی20 ورلڈ کپ 2026 میں پاکستان کی شرکت سے متعلق مختلف آپشنز پر مشاورت کی گئی۔ ملاقات میں قومی مفاد، سفارتی پہلوؤں اور کرکٹ بورڈ کی ممکنہ حکمت عملی پر بھی تفصیلی تبادلہ خیال ہوا۔

ذرائع کے مطابق ورلڈ کپ میں پاکستان کی شرکت سے متعلق مختلف آپشنز زیر غور آئے ہیں اور حتمی فیصلہ وزیراعظم شہباز شریف کی منظوری سے مشروط ہوگا۔ ذرائع کا کہنا ہے کہ چیئرمین پی سی بی نے وزیراعظم کو تمام دستیاب آپشنز سے آگاہ کر دیا ہے، جن میں بنگلہ دیش کرکٹ بورڈ کے مؤقف اور پاکستان کے ممکنہ لائحہ عمل پر بھی گفتگو شامل تھی۔

ذرائع کے مطابق محسن نقوی دیگر شراکت داروں اور متعلقہ اسٹیک ہولڈرز سے بھی مشاورت کریں گے تاکہ فیصلہ ہر پہلو سے جامع اور مؤثر ہو۔ اس کے ساتھ ساتھ وزیراعظم شہباز شریف کو وزیر داخلہ کی جانب سے بھی مجموعی صورتحال پر اعتماد میں لیا گیا ہے۔

مزید یہ بھی بتایا گیا ہے کہ قومی کرکٹ ٹیم کی ٹی20 ورلڈ کپ 2026 میں شرکت کے معاملے پر وزارت خارجہ کو بھی اعتماد میں لیا جائے گا تاکہ بین الاقوامی سطح پر کسی بھی ممکنہ سفارتی اثرات کا بروقت جائزہ لیا جا سکے۔ حکومتی سطح پر مشاورت مکمل ہونے کے بعد آئندہ چند روز میں اس اہم معاملے پر باضابطہ اعلان متوقع ہے۔