موبائل انڈسٹری کو دھچکا، پاکستان میں پیداوار میں واضح کمی ریکارڈ

یوتھ ویژن نیوز : (بہاول خان سے) پاکستان میں موبائل فون مینوفیکچرنگ کے شعبے میں گزشتہ برس کے مقابلے میں کمی ریکارڈ کی گئی ہے۔ پاکستان ٹیلی کمیونیکیشن اتھارٹی (پی ٹی اے) کی جانب سے جاری کردہ تازہ اعداد و شمار کے مطابق دسمبر 2025 کے دوران ملک میں 2 اعشاریہ 61 ملین موبائل فونز تیار کیے گئے، جو دسمبر 2024 کے مقابلے میں 12 فیصد کم ہیں۔

پی ٹی اے کے مطابق دسمبر 2024 میں پاکستان میں 2 اعشاریہ 95 ملین موبائل فونز کی تیاری ہوئی تھی، تاہم ایک سال بعد پیداوار میں نمایاں کمی سامنے آئی ہے۔ رپورٹ کے مطابق یہ کمی عالمی اور مقامی سطح پر درپیش معاشی چیلنجز اور صنعتی عوامل سے جڑی ہوئی سمجھی جا رہی ہے۔

اعداد و شمار کے مطابق سال 2025 کے دوران مجموعی طور پر 30 اعشاریہ 21 ملین موبائل فونز تیار کیے گئے، جو سالانہ بنیاد پر 4 فیصد کمی کو ظاہر کرتے ہیں۔ مجموعی پیداوار میں اسمارٹ فونز کا حصہ 52 فیصد رہا، جو ملکی موبائل مارکیٹ میں جدید ڈیوائسز کی بڑھتی ہوئی طلب کی عکاسی کرتا ہے۔

پی ٹی اے کا فوری طور پر کرپٹو کرنسی ویب سائٹس بلاک نہ کرنے کا فیصلہ

پی ٹی اے کی رپورٹ میں بتایا گیا کہ سال 2025 کے دوران ملک میں 15 اعشاریہ 64 ملین اسمارٹ فونز تیار کیے گئے، جبکہ ٹو جی موبائل فونز کی تعداد 48 فیصد حصے کے ساتھ 14 اعشاریہ 57 ملین رہی۔ اس سے ظاہر ہوتا ہے کہ اگرچہ اسمارٹ فونز کی مانگ برقرار ہے، تاہم مجموعی پیداوار میں کمی کا رجحان دیکھا گیا۔

اتھارٹی کے مطابق پاکستان نے سال 2025 میں مجموعی موبائل فونز کی طلب کا 93 فیصد مقامی سطح پر پورا کیا، جو مقامی مینوفیکچرنگ کی صلاحیت کا مظہر ہے۔ پی ٹی اے کا کہنا ہے کہ گزشتہ پانچ برسوں میں پاکستان نے مجموعی موبائل طلب کا 77 فیصد مقامی پیداوار کے ذریعے پورا کیا، جو موبائل مینوفیکچرنگ سیکٹر میں نمایاں پیش رفت کو ظاہر کرتا ہے۔

ماہرین کے مطابق اگرچہ پیداوار میں کمی ایک تشویشناک رجحان ہے، تاہم مقامی صنعت کی مضبوط بنیاد اور درآمدات پر انحصار میں کمی مستقبل میں موبائل مینوفیکچرنگ کے شعبے کی بحالی میں مددگار ثابت ہو سکتی ہے۔