توانائی اور اصلاحات: پاکستان کو 730 ملین ڈالر کی بڑی مالی معاونت
یوتھ ویژن نیوز : (مظہر اسحاق چشتی سے) پاکستان اور ایشیائی ترقیاتی بینک کے درمیان 730 ملین ڈالر کے دو منصوبوں پر دستخط، بجلی کی ترسیل اور سرکاری اداروں کی اصلاحات شامل۔
اسلام آباد: (یوتھ وژن) پاکستان اور ایشیائی ترقیاتی بینک کے درمیان مجموعی طور پر 730 ملین امریکی ڈالر مالیت کے دو اہم ترقیاتی منصوبوں پر دستخط ہوگئے ہیں۔
جن میں 330 ملین ڈالر کا سیکنڈ پاور ٹرانسمیشن اسٹرینتھننگ پراجیکٹ اور 400 ملین ڈالر کا سرکاری ملکیتی اداروں کی ٹرانسفارمیشن پروگرام شامل ہے، سیکرٹری اقتصادی امور محمد حمیر کریم نے اے ڈی بی کی مسلسل معاونت کو سراہتے ہوئے کہا کہ پاور ٹرانسمیشن منصوبہ مستقبل کے پن بجلی منصوبوں سے 2 ہزار 300 میگاواٹ اضافی بجلی کی ترسیل کو ممکن بنائے گا جس سے موجودہ ٹرانسمیشن لائنوں پر بوجھ کم اور ہنگامی حالات میں نظام کی مضبوطی میں اضافہ ہوگا۔
انہوں نے مزید کہا کہ سرکاری اداروں کی ٹرانسفارمیشن پروگرام ایس او ای ایکٹ 2023 اور ایس او ای پالیسی 2023 پر مؤثر عملدرآمد کو تقویت دے گا، اس موقع پر ایشیائی ترقیاتی بینک کی کنٹری ڈائریکٹر ایما فان نے حکومتِ پاکستان کے اصلاحاتی عزم کو سراہتے ہوئے توانائی کے بنیادی ڈھانچے کو مستحکم بنانے میں پاور ٹرانسمیشن منصوبے کی اہمیت پر زور دیا ۔
اور کہا کہ سرکاری ملکیتی اداروں کی اصلاحات پاکستان کی معاشی پائیداری کے لیے نہایت اہم ہیں، فریقین نے اس عزم کا اظہار کیا کہ فراہم کی جانے والی فنانسنگ کو مؤثر انداز میں استعمال کیا جائے گا اور منصوبوں کو مقررہ مدت میں مکمل کیا جائے گا۔
