خیبر پختونخوا میں دو کارروائیاں، 9 دہشت گرد ہلاک: آئی ایس پی آر

یوتھ ویژن نیوز : (ثاقب ابراہیم سے)خیبر پختونخوا میں دو انٹیلی جنس بیسڈ آپریشنز کے دوران 9 دہشت گرد ہلاک، آئی ایس پی آر کی تصدیق، سرچ آپریشن جاری۔

راولپنڈی کے مطابق آئی ایس پی آر نے بتایا ہے کہ خیبر پختونخوا میں 19 دسمبر 2025 کو دو الگ الگ انٹیلی جنس بیسڈ آپریشنز کے دوران مجموعی طور پر 9 دہشت گرد ہلاک ہوئے۔ کارروائیاں ضلع ڈیرہ اسماعیل خان اور بنوں میں کی گئیں۔؎

بیان کے مطابق ڈیرہ اسماعیل خان میں خفیہ معلومات پر کی گئی کارروائی کے دوران ایک ٹھکانے کو نشانہ بنایا گیا، جہاں فائرنگ کے تبادلے میں چار دہشت گرد مارے گئے۔ اسی روز بنوں میں ایک اور آپریشن کے دوران مزید پانچ دہشت گرد ہلاک ہوئے، جبکہ ان کے قبضے سے اسلحہ اور گولہ بارود بھی برآمد کیا گیا۔

آئی ایس پی آر کا کہنا ہے کہ ہلاک افراد سیکیورٹی فورسز اور شہریوں کے خلاف دہشت گرد سرگرمیوں میں ملوث رہے تھے۔ علاقے میں ممکنہ مزید عناصر کی موجودگی کے پیشِ نظر سرچ اور سینیٹائزیشن آپریشنز جاری ہیں، جبکہ قومی ایکشن پلان کے تحت انسدادِ دہشت گردی کی مہم بدستور جاری رکھنے کے عزم کا اعادہ کیا گیا ہے۔