جنرل (ر) قمر جاوید باجوہ گھر میں گر کر شدید زخمی، ڈاکٹروں نے ہنگامی معائنہ شروع کر دیا!
یوتھ ویژن نیوز : (ویب ڈسک) : پاکستان کے سابق آرمی چیف جنرل (ر) قمر جاوید باجوہ کے حوالے سے تشویشناک خبر سامنے آئی ہے کہ وہ اپنے گھر میں اچانک توازن بگڑنے اور گرنے کے باعث زخمی ہو گئے ہیں۔ اہلخانہ کے ذرائع کے مطابق یہ واقعہ اچانک پیش آیا، جس کے فوراً بعد انہیں طبی امداد کے لیے قریبی ہسپتال منتقل کیا گیا، جہاں ڈاکٹروں کی ایک ماہر ٹیم ان کا علاج کر رہی ہے۔
اہلخانہ کا بیان: سابق آرمی چیف کی حالت تسلی بخش،احتیاطی تدابیر کے تحت زیرِ نگرانی
ذرائع کا مزید کہنا ہے کہ ہسپتال میں جنرل (ر) باجوہ کا مکمل طبی معائنہ کیا جا رہا ہے اور مختلف ضروری ٹیسٹ بھی کیے گئے ہیں تاکہ کسی بھی قسم کی اندرونی چوٹ کا خدشہ ختم کیا جا سکے۔ اگرچہ اہلخانہ نے ان کی حالت کو تسلی بخش قرار دیا ہے، تاہم ڈاکٹروں نے احتیاطی تدابیر کے پیشِ نظر انہیں فی الحال اپنی زیرِ نگرانی رکھنے کا فیصلہ کیا ہے۔
سابق آرمی چیف کے زخمی ہونے کی اطلاع ملتے ہی سوشل میڈیا اور سیاسی و سماجی حلقوں میں ان کی صحت یابی کے حوالے سے پیغامات کا سلسلہ شروع ہو گیا ہے۔ ان کے قریبی رفقاء اور مداحوں کی جانب سے ان کی جلد اور مکمل صحت یابی کے لیے نیک تمناؤں کا اظہار کیا جا رہا ہے۔ واضح رہے کہ جنرل (ر) قمر جاوید باجوہ پاکستان کی عسکری تاریخ میں ایک اہم مقام رکھتے ہیں اور ان کے دورِ ملازمت کے دوران کئی اہم دفاعی فیصلے کیے گئے تھے۔
