بلوچستان کی ترقی کے لیے سرمایہ کاری اور شمولیت پر زور
یوتھ ویژن نیوز : (خصؤصی رپورٹ برائے علی رضا سے) چیئرمین سینیٹ نے کہا کہ بلوچستان پاکستان کے معاشی مستقبل، علاقائی رابطہ کاری اور قومی سلامتی میں مرکزی حیثیت رکھتا ہے، اس لیے صوبے میں بنیادی ڈھانچے، تجارت، معدنی وسائل اور رابطہ کاری کے شعبوں میں سرمایہ کاری کو ترجیح دی جانی چاہیے۔ انہوں نے کہا کہ بلوچستان جنوبی ایشیا کو وسطی ایشیا اور مشرق وسطیٰ سے جوڑنے والا اہم خطہ ہے، جس کا فائدہ پورے ملک کو ہو سکتا ہے۔
انہوں نے بلوچستان کے عوام کے آئینی حقوق، ترقی اور شمولیتی عمل کے لیے ریاستی عزم کا اعادہ کرتے ہوئے کہا کہ وفاق اور صوبے کے درمیان اعتماد اور شراکت داری کے بغیر پائیدار ترقی ممکن نہیں۔ ایس آئی ایف سی، ریکوڈک منصوبہ اور سی پیک سے وابستہ منصوبے صوبے میں سرمایہ کاری، روزگار کے مواقع اور مہارتوں کی ترقی میں مدد دے سکتے ہیں، بشرطیکہ ان میں مقامی مفادات اور شفافیت کو مقدم رکھا جائے۔
چیئرمین سینیٹ نے کہا کہ بلوچستان کے عوام کی ثقافت، تاریخ اور روایات پاکستان کی قومی شناخت کا اہم حصہ ہیں اور صوبے کو ترقی کے عمل میں برابر کا شریک بنانا قومی یکجہتی کے لیے ناگزیر ہے۔ انہوں نے زور دیا کہ ترقی صرف معاشی نہیں بلکہ سماجی، تعلیمی اور ادارہ جاتی ہونی چاہیے تاکہ عوام کی زندگیوں میں حقیقی بہتری آ سکے۔
انہوں نے موسمیاتی تبدیلی کے اثرات کا حوالہ دیتے ہوئے کہا کہ بلوچستان کو سیلاب، شدید بارشوں اور قدرتی آفات جیسے مسائل کا سامنا ہے جس سے جان و مال کا نقصان ہوتا ہے۔ اس کے لیے فوری امداد کے ساتھ ساتھ طویل المدتی منصوبہ بندی، ماحولیاتی تحفظ اور آفات سے نمٹنے کی صلاحیت بڑھانے کی ضرورت ہے۔
چیئرمین سینیٹ نے نوجوانوں پر خصوصی توجہ دینے کی ضرورت پر زور دیتے ہوئے کہا کہ تعلیم، فنی تربیت اور روزگار کے مواقع فراہم کر کے ہی نوجوانوں کو امن، ترقی اور قومی یکجہتی کا مؤثر کردار بنایا جا سکتا ہے۔ انہوں نے کہا کہ بااختیار نوجوان ہی پائیدار امن اور خوشحالی کی ضمانت ہیں۔
انہوں نے قومی ورکشاپ بلوچستان کو ایک مثبت اقدام قرار دیتے ہوئے کہا کہ اس طرح کے فورمز پالیسی سازوں، ماہرین، نوجوان رہنماؤں اور تعلیمی حلقوں کو مکالمے اور تعاون کا موقع فراہم کرتے ہیں، جو قومی ہم آہنگی اور بہتر فیصلہ سازی کے لیے ضروری ہے۔ انہوں نے شرکاء پر زور دیا کہ وہ آئینی اقدار، جمہوری اصولوں اور تنوع کے احترام کو مدنظر رکھتے ہوئے قومی ترقی میں اپنا کردار ادا کریں۔
