بائنانس کی سینئر لیڈرشپ کا پاکستان کا دورہ، حکومت کا ڈیجیٹل اثاثہ جات کی ریگولیشن کے عزم کا اعادہ

یوتھ ویژن نیوز : بائنانس کی سینئر لیڈرشپ نے پاکستان کا دورہ کرتے ہوئے وزیراعظم شہباز شریف و عسکری قیادت سے ملاقات کی۔ حکومت نے ڈیجیٹل اثاثہ جات کی ریگولیشن کے مضبوط عزم کا اعادہ کیا۔

بائنانس کی سینئر لیڈرشپ نے پاکستان کا دورہ کیا ہے جہاں کمپنی کی اعلیٰ عالمی قیادت نے اسلام آباد میں ملک کی اعلیٰ قیادت سے ملاقاتیں کیں۔ اس موقع پر حکومتِ پاکستان نے ڈیجیٹل اثاثہ جات اور ورچوئل فنانس کے شعبے میں مضبوط اور جامع ریگولیٹری فریم ورک کے قیام کے لیے اپنے عزم کو دہرایا۔

وزیراعظم آفس کے میڈیا ونگ کے مطابق بائنانس کے گلوبل سی ای او رچرڈ ٹینگ کی قیادت میں وفد نے اسلام آباد میں اہم حکومتی شخصیات سے ملاقات کی۔ ملاقات میں وزیراعظم محمد شہباز شریف، چیف آف ڈیفنس فورسز اور چیف آف آرمی اسٹاف فیلڈ مارشل سید عاصم منیر بھی موجود تھے۔

اجلاس میں پاکستان میں ڈیجیٹل فنانس، بلاک چین ٹیکنالوجی، سائبر سیکیورٹی، سرمایہ کاری کے مواقع اور ڈیجیٹل اثاثہ جات کی ریگولیشن کے امور پر تبادلہ خیال ہوا۔ حکومت نے واضح کیا کہ پاکستان کی ڈیجیٹل معیشت کو محفوظ، شفاف اور عالمی معیار کے مطابق بنانے کے لیے فوری ریگولیٹری اقدامات وقت کی ضرورت ہیں۔

اس موقع پر چیئرمین پاکستان ورچوئل ایسٹ ریگولیٹری اتھارٹی (PVARA) بلال بن ثاقب نے اجلاس میں بریفنگ دی اور اپنے ادارے کی کارکردگی سمیت ڈیجیٹل اثاثوں کے شعبے کے لیے ممکنہ فریم ورک پر روشنی ڈالی۔

حکومتی حکام نے کہا کہ پاکستان عالمی ڈیجیٹل فنانس مارکیٹ کے ساتھ ہم آہنگ نئی پالیسیاں تشکیل دے رہا ہے، تاکہ سرمایہ کاروں کو اعتماد، صارفین کو تحفظ اور کاروباروں کو بہتر مواقع میسر آ سکیں۔ بائنانس وفد نے ڈیجیٹل اثاثہ جات کی ریگولیشن کے حوالے سے پاکستان کے عزم کو سراہا اور اس شعبے میں تعاون بڑھانے کی یقین دہانی کرائی۔