حکومت ماحولیاتی بحران سے نمٹنے کے لیے جامع پالیسیوں پر عمل پیرا ہے، کاروباری برادری ماحول دوست طریقوں کو اپنائیں، رومینہ خورشید عالم
یوتھ ویژن : وزیر اعظم کی کوآرڈینیٹر برائے ماحولیاتی تبدیلی رومینہ خورشید عالم نے کاروباری برادری پر زور دیا ہے کہ وہ ماحول دوست طریقوں کو اپنائے اور قومی موسمیاتی اہداف کی حمایت کرے۔ ان خیالات کا اظہار انہوں نے فیصل آباد چیمبر آف کامرس اینڈ انڈسٹریز (ایف سی سی آئی)کے دو رکنی وفد سے ملاقات کے دوران کیا،جس کی قیادت ایف سی سی آئی کے صدر ریحان نسیم بھراڑہ کر رہے تھے۔
رومینہ خورشید عالم نے تجویز پیش کی کہ پاکستان کے تمام چیمبرز کی ایک گول میز کانفرنس منعقد کی جائے تاکہ کاربن کریڈٹ منصوبوں، نجی شعبے کو صاف توانائی کے استعمال اور کاروباری سرگرمیوں کے دوران پائیدار ماحولیاتی طریقوں کو اپنانے کی اہمیت سے آگاہ کیا جاسکے۔ انہوں نے کہا کہ حکومت موسمیاتی بحران سے نمٹنے کے لیے جامع پالیسیوں پر عمل پیرا ہے جو کاربن کے اخراج کو کم کرنے اور صنعتوں میں پائیدار گرین ٹیکنالوجیز کو فروغ دینے پر مرکوز ہیں۔
انہوں نے کہا کہ ماحولیاتی تبدیلی ایک چیلنج ہے جس کے لیے معاشرے کے تمام شعبوں بشمول کاروباری برادری کی شمولیت ضروری ہے، کاروباری ادارے توانائی کی بچت کرنے والی ٹیکنالوجیز اپنائیں، فضلہ کم کریں اور ماحول دوست پیداوار کے عمل کو نافذ کریں۔ رومینہ خورشید عالم نے ایف سی سی آئی کو یورپی یونین کے کاربن بارڈر ایڈجسٹمنٹ میکانزم کی پالیسی کے مقامی صنعتوں میں نفاذ پر غور کرنے کی ترغیب دی اور کہا کہ کاروباری اداروں کو اپنے کاربن کے اثرات سے آگاہ ہونے کی ضرورت ہے ، انہیں اپنے ماحولیاتی اثرات کو کم کرنے کے لیے آگے بڑھنا چاہیے۔
ایف سی سی آئی کے صدر ریحان نسیم بھراڑہ نے حکومت کے ماحولیاتی تبدیلی کے حوالے سے اقدامات کی حمایت کا یقین دلایا اور شہر کے صنعتی شعبے میں ماحولیاتی پائیداری کو فروغ دینے کے عزم کا اعادہ کیا۔ انہوں نے کہا کہ ایف سی سی آئی گرین ٹیکنالوجیز کے فروغ اور اس شعبے میں سرمایہ کاری کے مواقع تلاش کرنے کی کوشش جاری رکھے گی تاکہ اپنے ارکان کو ماحولیاتی طور پر پائیدار کاروباری ماڈلز کی طرف منتقل کیا جاسکے۔
فریقین نے وزارت ماحولیاتی تبدیلی اور ایف سی سی آئی کے درمیان تعاون کو مضبوط کرنے پر اتفاق کیا تاکہ اس خطے میں ایک پائیدار سبز اقتصادی ماڈل تیار کیا جاسکے۔ ملاقات کے اختتام پر اس بات پر اتفاق کیا گیا کہ فیصل آباد کی صنعتوں کو ملک میں گرین انرجی کے شعبے میں قیادت فراہم کرنے کے لیے حکمت عملی تیار کی جائے جو دوسرے علاقوں کے لیے ایک مثال بنے ۔
