نہ ان ہاؤس تبدیلی آئے گی، نہ حکومت ختم ہو گی، شاہ محمود قریشی
ملتان(واصب ابراہیم غوری سے )وزیر خارجہ مخدوم شاہ محمود قریشی نے کہا ہے کہ عوام سے لا تعلق نہیں‘ عوام کی پریشانیوں کا احساس ہے،عوام کا ساتھ نبھانے کی بھرپور کوشش کررہے ہیں،مہنگائی کا تدارک کرنے کی کوشش کررہے ہیں۔ کرونا کے باعث گزشتہ دو سال سے عالمی معیشت بھی بحرانو ں کی زد میں ہے۔ 2023ء سے قبل مہنگائی کے جن کو بوتل میں بند کریں گے۔ مشکلات عارضی ہیں وطن کی مٹی سے پیار ہے وطن میں رہنا ہے۔ ملک سے وفا کرنا جانتے ہیں، بیرون ملک نہ کوئی فلیٹس ہیں، نہ کوئی اکاؤنٹس ہیں اور نہ ہی کسی کا باہر جانے کا پروگرام ہے۔ عوام میں سے ہیں اور عوام کے ساتھ ہی رہیں گے۔ ان خیالات کااظہارانہوں نے گزشتہ روز گورنمنٹ پرائمری سکول اعوان پورہ کی مڈل سکول میں اپ گریڈیشن اور این اے 156 کی مختلف یونین کونسلوں میں تقریبات سے خطاب کرتے ہوئے کیا۔ انہوں نے کہامشکلات آتی رہتی ہیں اور انشاء اللہ ختم ہوجائیں گی۔ تمام بحرانوں کا ڈٹ کر مقابلہ کریں گے۔ اپوزیشن جتنے مرضی مارچ کر لے نہ ان ہاؤس تبدیلی آئیگی اور نہ حکومت ختم ہوگی۔اپوزیشن کو شکست ہوگی۔ تحریک انصا ف کی جمہوری حکومت اپنی مدت پوری کریگی۔انہوں نے کہا ہماری نیت درست،دامن صاف، ہاتھ صاف ہیں۔ تحریک انصا ف کی حکومت کا ایک بہت بڑا کریڈٹ ہے کہ کسی قسم کا کرپشن کا سکینڈل سامنے نہیں آیا۔ وزیراعظم عمران خان کی کرپشن کے حوالے سے زیروٹالرنس کی پالیسی قابل تحسین ہے۔ ماضی میں کرپشن اور اپنو ں کو نوازنے کے چکرمیں قومی خزانے کو بے دردی سے لوٹا گیا۔ بیرون ملک جائیدادیں بنائی گئیں۔فارن کرنسی اکاؤنٹ کھولے گئے۔ماضی کے حکمران دوران اقتدار ملک میں رہے اور اقتدار کے بعد بیرون ملک جا رکر لوٹے گئے پیسوں سے عیاشی کی گئی۔ مگر اب ایسا نہیں ہے موجودہ حکومت شفافیت پر یقین رکھتے ہوئے قومی خزانے اور وسائل کو عوامی ترقی پر صرف کررہی ہے۔ پہلی مرتبہ عوام کا پیسہ حقیقی معنوں میں عوام کی ترقی پر صرف ہو رہاہے۔ انہوں نے کہا وسائل کے مقابلے میں مسائل زیادہ ہیں۔ جو راتوں رات حل نہیں ہوسکے۔ عوام کے مسائل اور پریشانیو ں کا ادراک ہے جنہیں حل کرنے کیلئے کوشش کررہے ہیں۔ انہوں نے کہا تحریک انصاف خوش قسمت جماعت ہے جس کے پاس خلوص اور محبت کرنے والے کارکن ہیں۔ 2013ء کے انتخابات میں اپوزیشن کاٹی۔ ہمیں ترقیاتی فنڈز کیلئے بجٹ نہیں ملا۔ لیکن مخلص کارکن ہمارے ساتھ رہے۔ 2018ء کے انتخابات میں عوام نے تحریک انصاف پر اعتماد کیا۔ عوا م کے اعتماد پر پورا اترے۔ اب ہم اقتدار میں تمام تر توانائیاں اور وسائل عوام اور عوامی ترقی پر صر ف کررہے ہیں۔ 2018ء کے انتخابات کے دوران عوام سے کئے گئے تمام وعدے پورے کر رہے ہیں۔ 5 سال خلوص نیت سے تمام وسائل اور توانائیاں عوامی ترقی پر صرف کریں گے اور 2023ء کی عوامی عدالت میں 5سالہ کارکردگی کی بنیاد پر جائیں گے اور انشاء اللہ 2023ء کے انتخابات میں بھی تحریک انصاف ملک بھر میں پھرپور کامیابی حاصل کریگی۔ انہوں نے کہا ابھی الیکشن کا وقت نہیں نہ ہی الیکشن کی تیاریاں ہیں۔ عوام کے ساتھ رابطے میں ہیں اور عوام کے درمیان موجود ہیں۔تقریب سے صوبائی پارلیمانی سیکرٹری اطلاعات ندیم قریشی ودیگر نے خطاب کیا۔ اس موقع پر شیخ طاہر‘ شمشیر خان‘ شازیہ وحید ارائیں‘ عروج بخاری‘ مختیار زیدی‘ امین انصاری‘ سید طالب پرواز سمیت عوام کی کثیر تعداد موجود تھی۔قبل ازیں وزیر خارجہ مخدوم شاہ محمود قریشی نے ملتان میں مصروف دن گزارا۔ وہ دربار حضرت موسیٰ پاک کے سجادہ نشین مخدوم سید ابوالحسن گیلانی کی رہائش گاہ پر گئے جہا ں انہوں نے ان کے بھائی مخدوم میراں مصطفی کے انتقال پر اظہار افسوس کیا اور فاتحہ خوانی کی۔ وزیر خارجہ مخدوم شاہ محمود قریشی حاجی جاوید اختر انصاری کی رہائش گاہ پر گئے جہاں انہوں نے حاجی جاوید اختر انصاری سے ان کے سسر کی وفات پر اظہار افسوس کیا۔ وہ مشتاق بھٹہ اور مظہر بھٹہ کی رہائش گاہ پر گئے جہاں انہوں نے انکی والدہ کی وفات پر اظہار افسوس کیا۔ پی ٹی آئی رہنما ملک آصف وجڑ کے چچا کی قل خوانی میں شرکت کی۔ وہ شاہ رکن عالم میں اعجاز قریشی‘ عتیق قریشی‘ شفیق قریشی‘ حامد قریشی ٹائلز والوں کی رہائش گاہ پر گئے اور ان کی والدہ کی وفات پر فاتحہ خوانی کی۔وزیر خارجہ مخدوم شاہ محمود قریشی سیاسی و سماجی رہنما ملک عاشق علی شجرا کی رہائش گاہ پر گئے جہاں انہوں نے ان کے صاحبزادے کی شادی کی مبارک باد پیش کی اور نیک خواہشات کا اظہار کیا#