سعودی ولی عہد شہزادہ محمد بن سلمان 2021 کے عرب دنیا کے سب سے قد آوررہنما قرارپائے،سروے رپورٹ
ریاض (ثاقب ابراہیم غوری سے ):سعودی عرب کے ولی عہد شہزادہ محمد بن سلمان 2021 کے عرب دنیا کے سب سے قد آور رہنما قرار پائے ہیں۔ سعودی ذرائع ابلاغ نے روس کے معروف نیوز چینل کی خصوصی سروے رپورٹ کے حوالے سے بتایا کہ 2021 کے سب سے قد آور عرب رہنما بارے ووٹنگ ہوئی،
سروے میں 53 لاکھ 20 ہزار 927 افراد نے حصہ لیا جن میں سے 19 لاکھ 47 ہزار 362 نے سعودی ولی عہد شہزادہ محمد بن سلمان کے حق میں ووٹ دیا جو کل رائے دہندگان کا 36.7 فیصد ہے۔ اردنی فرمانروا شاہ عبداللہ الثانی 13 لاکھ 87 ہزار 643 ووٹ حاصل کر کے تیسرے نمبر پر رہے، انہوں نے مجموعی طور پر 26.1 فیصد ووٹ حاصل کیے،
عراق کے مذہبی پیشوا مقتدی الصدر 88 ہزار 69 ووٹوں کے ساتھ چوتھے نمبر پر،مراکش کے شاہ محمد السادس پانچویں، الجزائر کے عبدالمجید تبون چھٹے، حزب اللہ کے حسن نصر اللہ ساتویں، مصر کے عبدالفتاح السیسی آٹھویں، شام کے بشار الاسد نویں اور سوڈان کے عبدالفتاح البرہان دسویں نمبر پر آئے۔
آرٹی کے سروے میں دیگر عرب رہنماؤں کے حوالے سے بھی اظہار رائے کیا گیا ان میں ابوظہبی کے ولی عہد شیخ محمد بن زاید، دبئی کے محمد بن راشد آل مکتوم، امیر قطر شیخ تمیم بن حمد آل ثانی، بحرینی فرمانروا شاہ حمد بن عیسی ٰآل خلیفہ، امیر کویت نواف الاحمد الجابر الصباح، سلطنت عمان کے فرمانرواہیثم بن طارق، تیونس کے صدر قیس سعید، تیونس کی وزیراعظم نجلا بودن، فلسطینی صدر محمود عباس، لبنانی صدر میشال عون،
عراقی صدر برہم صالح، عراقی وزیراعظم مصطفی الکاظمی، یمنی صدر عبدالرب منصور ھادی، لیبیا کی قومی فوج کے کمانڈر جنرل فیلڈ مارشل خلیفہ حفتر، لیبیا کے وزیراعظم عبدالحمید الدبیبہ اور لیبیا کی وزیر خارجہ نجلا المنقوش وغیرہ کے نام بھی شامل ہیں-
