اسلامیہ یونیورسٹی بہاولپور کے بغداد الجدید کیمپس میں 2.5 میگا واٹ سولر پاور پلانٹ کا افتتاح کر دیاگیا
بہاول پور(علی رضا غوری سے )صوبائی وزیر برائے توانائی ڈاکٹر محمد اختر ملک نے اسلامیہ یونیورسٹی بہاولپور کے بغداد الجدید کیمپس میں 2.5 میگا واٹ سولر پاور پلانٹ کا افتتاح کر دیاجس کے بعد سولر پلانٹ سے بجلی کی فراہمی کاآغاز ہو گیا ہے۔اس موقع پر صوبائی وزیر برائے توانائی ڈاکٹر محمد اختر ملک نے ذرائع ابلاغ کے نمائندوں سے گفتگو کرتے ہوئے کہا کہ محکمہ توانائی حکومت پنجاب کی جانب سے مکمل کیے جانے والے اس منصوبے کی کل لاگت 30 کروڑروپے ہے۔2.5میگا واٹ سستی بجلی کا یہ منصوبہ جامعہ کی توانائی کی ضروریات پوری کرنے کے ساتھ ساتھ قومی گرڈ نظام کو بھی سپلائی مہیا کرئے گا۔
صوبائی وزیر نے کہا کہ یہ منصوبہ حکومت پنجاب کا پنجاب کی جامعات اور تعلیمی اداروں سکولوں کو سولر توانائی سے منسلک کرنے کا حصہ ہے تاکہ وزیر اعظم پاکستان کے گرین پاکستان ویژن کے تحت پنجاب کو ماحول دوست توانائی سے منسلک کیا جائے اور اربوں روپے کے زرمبادلے کی بچت ہو۔اس موقع پر وائس چانسلر انجینئر پروفیسر ڈاکٹر اطہر محبوب، پرو وائس چانسلر پروفیسر ڈاکٹر نوید اختر، اورممبرصوبائی اسمبلی ڈاکٹرمحمد افضل بھی موجود تھے۔ صوبائی وزیر برائے توانائی ڈاکٹر محمد اختر ملک نے کہاکہ ہمیں جس رفتار سے رینوایبل انرجی کی طرف جانا چاہیے تھا، پچھلی تین دہائیوں سے پوری دنیا اس انرجی کی طرف جا رہی تھی ہم نے کورپاور پلانٹ، تھرمل پلانٹ اور ایسے پلانٹ لگائے جس سے مہنگی بجلی پیدا ہوئی۔صوبائی وزیر نے کہاکہ ہم نے 11ہزار پرائمری سکولوں کو رینوایبل انرجی پر منتقل کر دیا ہے اور مزید 4500سکول اس مارچ میں مکمل ہوجائیں گے اور 2400کے قریب بنیادی صحت کے مراکز بھی اس مالی سال میں مکمل کر لیے جائیں گے۔14 ڈسٹرکٹ ہسپتال منتقل ہو چکے ہیں اور باقی اگلے سال میں مکمل ہو جائیں گے۔ اس کے علاوہ پولیس اسٹیشن، شیلٹر ہومز،کمشنر آفس، کالجز، یونیورسٹیزاور پبلک کنکشن کو بھی منتقل کیا جائے گا۔ صوبائی وزیر نے بتایا کہ قائد اعظم سولر پارک میں مزید 100میگاواٹ بجلی پیدا کرنے کا منصوبہ شروع کر رہے ہیں جس سے اورنج ٹرین اور دیگر محکموں کو بجلی فراہم کی جائے گی۔ قبل ازیں انجینئر پروفیسر ڈاکٹر اطہر محبوب وائس چانسلر اسلامیہ یونیورسٹی بہاولپور نے بریفنگ دیتے ہوئے بتایا کہ وزیر اعظم پاکستان پروگرام کے تحت ہمیں جو انرجی ملے گی اْس سے یونیورسٹی کو تقریبا70ملین روپے کی سالانہ بچت ہو گی جب یونیورسٹی کا انرجی لوڈ کم ہوگاتو نیٹ میٹرنگ کے ذریعے نیشنل گریڈ میں بھی بجلی مہیا کریں گے جس سے یونیورسٹی کو کافی بچت ہو گی۔بعدازاں صوبائی وزیر نے وائس چانسلر کے ہمراہ ترقیاتی منصوبوں کا دورہ کیا جن میں پاکستانی جامعات میں اپنی نوعیت کا پہلا کالج آف نرسنگ، ایمفی تھیٹر، پبلک پرائیویٹ پارٹنرشپ کے تحت 4ارب روپے کے زیر تعمیر فیکلٹی عمارات، کالج آف آرٹ اینڈ ڈیزائن کی نئی عمارت شامل ہے۔صوبائی وزیر نے اپنے دورے کے دوران ہاکڑہ آرٹ گیلری کا بھی دورہ کیا اور طلباء وطالبات کے بنائے ہوئے فن پاروں کی تعریف کی۔صوبائی وزیر برائے توانائی ڈاکٹر محمد اختر ملک نے مرکزی آڈیٹوریم میں اساتذ ہ اور طلباء وطالبات سے خطاب کیا۔ اس موقع پر پروجیکٹ ڈائریکٹر عارف منصورقیصرانی نے سولر پارک سے متعلق تفصیلی بریفنگ دی۔
