اسلام آباد ہائی کورٹ نے الیکشن ٹربیونل کے جج کو تبدیل کرنے کا الیکشن کمیشن کا فیصلہ کالعدم قرار دے دیا

یوتھ ویژن : ( واصب ابراہیم غوری سے ) اسلام آباد ہائی کورٹ (آئی ایچ سی ) نے الیکشن کمیشن آف پاکستان (ای سی پی ) کے فیصلے کو کالعدم قرار دے دیا ہے جس میں الیکشن ٹربیونل کے جج جسٹس طارق محمود جہانگیری کو تبدیل کرنے کا حکم دیا گیا تھا۔

تفصیلات کے مطابق چیف جسٹس عامر فاروق نے مقدمے کی سماعت کی اور محفوظ کیا گیا فیصلہ سنایا۔ عدالت نے کیس واپس الیکشن کمیشن کو بھجواتے ہوئے ہدایت کی کہ وہ دوبارہ فیصلہ کریں۔

الیکشن کمیشن نے ایک ریٹائرڈ جج کو ٹربیونل میں تعینات کرتے ہوئے جسٹس جہانگیری کو تبدیل کیا تھا، جس کو پاکستان تحریک انصاف (پی ٹی آئی ) کے رہنماؤں شوائب شاہین، عامر مغل اور علی بخاری نے چیلنج کیا تھا۔

اس سے قبل، الیکشن کمیشن نے پاکستان مسلم لیگ نون (PML-N) کے ایم این ایز کی جانب سے دائر کردہ درخواستیں قبول کر لی تھیں، جس میں اسلام آباد کے تین حلقوں میں الیکشن ٹربیونل کو تبدیل کرنے کی درخواست کی گئی تھی۔

چار رکنی بینچ کی سربراہی چیف الیکشن کمشنر سکندر سلطان راجہ نے کی اور محفوظ فیصلہ سنایا۔

بینچ نے خرم نواز، انجم عقیل اور طارق فضل چوہدری کی درخواستوں کو قبول کر لیا، جنہوں نے موقف اختیار کیا تھا کہ ٹربیونل غیر جانبدار نہیں ہے۔