کراچی میں آئی سی سی وفد کی چیمپئنز ٹرافی 2025 کی تیاریوں کا معائنہ، تعمیراتی کاموں کا جائزہ

یوتھ ویژن : ( واصب ابراہیم غوری سے ) انٹرنیشنل کرکٹ کونسل (آئی سی سی) کے ایک وفد نے بدھ کے روز نیشنل اسٹیڈیم کراچی کا دورہ کیا تاکہ چیمپئنز ٹرافی 2025 کے لیے کی جانے والی تیاریوں کا جائزہ لیا جا سکے۔ وفد گزشتہ رات کراچی پہنچا اور آج صبح نیشنل اسٹیڈیم کا دورہ کیا، جہاں انہوں نے جاری تعمیراتی کاموں اور ٹورنامنٹ کی تیاریوں کا تفصیلی معائنہ کیا۔

اس دورے کے بعد آئی سی سی وفد اسلام آباد اور لاہور کا بھی دورہ کرے گا، جہاں وہ اگلے مرحلے کے لیے وہاں کے وینیوز کا جائزہ لے گا۔ دورہ مکمل ہونے کے بعد، وفد ایک جامع رپورٹ تیار کرے گا جس میں تمام وینیوز اور تیاریوں کے حوالے سے سفارشات شامل ہوں گی۔

چیمپئنز ٹرافی 2025 فروری سے مارچ کے درمیان پاکستان میں منعقد ہونے والی ہے، تاہم بھارت کی شرکت غیر یقینی ہے کیونکہ بھارتی کرکٹ بورڈ (بی سی سی آئی) کو اپنی حکومت کی منظوری کا انتظار ہے۔

اس سے قبل، پاکستان کرکٹ بورڈ (پی سی بی) نے چیمپئنز ٹرافی کی میزبانی کے لیے لاہور، کراچی اور راولپنڈی کے تین بڑے کرکٹ اسٹیڈیمز کی اپ گریڈیشن کے لیے 12.80 ارب روپے مختص کیے تھے۔ یہ اسٹیڈیمز فروری 2025 میں اس ایونٹ کی میزبانی کریں گے۔

چیمپئنز ٹرافی میں دو گروپس بنائے گئے ہیں: گروپ اے میں پاکستان، بھارت، نیوزی لینڈ اور بنگلہ دیش شامل ہیں، جبکہ گروپ بی میں آسٹریلیا، انگلینڈ، افغانستان اور جنوبی افریقہ شامل ہوں گے۔