بلاول بھٹو کا نیا میثاق جمہوریت کا مطالبہ، سیاسی جماعتوں کو متحد ہونے کی دعوت
اسلام آباد: پاکستان پیپلز پارٹی کے چیئرمین بلاول بھٹو زرداری نے سیاسی جماعتوں کو ایک نئے "میثاق جمہوریت” پر متحد ہونے کی دعوت دی ہے۔
پارلیمنٹ ہاؤس میں میڈیا سے گفتگو کرتے ہوئے بلاول بھٹو زرداری نے موجودہ سیاسی صورتحال میں جمہوری اقدار کو مضبوط کرنے اور سیاسی جماعتوں کے درمیان بہتر ورکنگ ریلیشنز کی ضرورت پر زور دیا۔
انہوں نے کہا کہ ملک کو درپیش بنیادی مسائل کا حل کرنا ہماری اولین ترجیح ہے، اور اگر حکومت عوامی مسائل حل کرنے میں ناکام ہو جائے تو حکومت کا مقصد ختم ہو جاتا ہے۔
چیف جسٹس کی مدت ملازمت میں توسیع کے سوال پر بلاول بھٹو نے اسے ایک ذاتی معاملہ قرار دے کر مسترد کر دیا اور آئینی ترامیم کے مؤثر نفاذ کی ضرورت پر زور دیا۔
بلاول بھٹو نے یہ بھی کہا کہ مولانا فضل الرحمان کا اپوزیشن میں کلیدی کردار ہے اور ان کے مثبت تعاون کی ضرورت ہے۔ انہوں نے معاشی مسائل کے حل اور غربت کے خاتمے کو قومی ترجیح قرار دیا۔
وزیر اعظم شہباز شریف کے "چارٹر آف اکانومی” کے تصور کی حمایت کرتے ہوئے بلاول بھٹو نے کہا کہ قومی معیشتی حکمت عملی تب ہی کامیاب ہو سکتی ہے جب اس میں تمام سیاسی اسٹیک ہولڈرز کی مشاورت شامل ہو۔
