سوشل میڈیا پر عدلیہ مخالف مہم، عمران ریاض سمیت 7 افراد پر مقدمہ درج
یوتھ ویژن: وفاقی تحقیقاتی ایجنسی (ایف آئی اے) نے سوشل میڈیا پر عدلیہ کے خلاف مہم چلانے پر معروف یوٹیوبر عمران ریاض سمیت 7 افراد کے خلاف مقدمہ درج کرلیا ہے۔ ایف آئی اے سائبر کرائم سرکل اسلام آباد میں درج کیے گئے اس مقدمے میں عمران ریاض کے علاوہ مجاہد علی شاہ، اللہ نواز خان، سہیل احمد، عمر صادق، صدیق انجم، مصدق عباسی، اور طارق سلیم کو بھی نامزد کیا گیا ہے۔
مقدمہ اسلام آباد کے جی-14 علاقے کے رہائشی احمد صادق خان کی شکایت پر درج کیا گیا ہے، جو کہ جج احمد صدیق کے قریبی عزیز ہیں۔ مدعی نے الزام لگایا کہ ملزمان نے عدلیہ اور ان کے چچا کے خلاف سوشل میڈیا پر مہم چلا کر ان کی ساکھ کو نقصان پہنچایا اور انہیں ہراساں کرنے کی کوشش کی۔
مقدمہ ‘وائلیشن آف پرائیویسی’ کی دفعہ 20 پیکا ایکٹ، دھمکیوں اور اعانت جرم کی دفعات کے تحت درج کیا گیا ہے۔ ذرائع کے مطابق، اینٹی کرپشن خیبرپختونخوا کے مشیر مصدق عباسی کو بھی اس مقدمے میں شامل کیا گیا ہے۔ ایف آئی اے حکام کا کہنا ہے کہ انکوائری کے بعد الزامات کی تصدیق ہونے پر یہ مقدمہ درج کیا گیا، اور جلد ہی نامزد افراد کی گرفتاری کا امکان ہے۔
مزید برآں، ذرائع نے انکشاف کیا ہے کہ اسی نوعیت کے مقدمات دیگر وی لاگرز اور یوٹیوبرز کے خلاف بھی درج کیے جانے کا امکان ہے۔
