سیکیورٹی فورسز کا ایف سی ہیڈکوارٹر پر حملہ ناکام، چار خوارج ہلاک
یوتھ ویژن : ( مظہر اسحاق چشتی سے ) سیکیورٹی فورسز نے خیبرپختونخوا کے ضلع مہمند میں فرنٹیئر کور (ایف سی) ہیڈکوارٹر پر حملے کو کامیابی سے ناکام بنا دیا۔ پاک فوج کے شعبہ تعلقات عامہ (آئی ایس پی آر) کے مطابق، یہ حملہ چار خودکش بمباروں کے ایک گروپ نے کیا تھا جو انتہا پسند گروہ فتنہ الخوارج سے تعلق رکھتے تھے۔
آئی ایس پی آر کے بیان کے مطابق، سیکیورٹی فورسز نے حملہ آوروں کو کیمپ میں داخل ہونے سے روک دیا اور تمام خودکش بمباروں کو ان کے ہدف تک پہنچنے سے پہلے ہی ہلاک کر دیا۔ علاقے میں مزید دہشت گردوں کی موجودگی کا سراغ لگانے کے لیے صفائی آپریشن جاری ہے۔
آئی ایس پی آر نے کہا کہ پاکستان کی سیکیورٹی فورسز دہشت گردی کے ناسور کو ملک سے ختم کرنے کے لیے پُرعزم اور مضبوط ارادے کے ساتھ کھڑی ہیں۔
علاوہ ازیں، پشین ضلع میں سرخاب پناہ گزین کیمپ میں سیکیورٹی فورسز کے ساتھ فائرنگ کے تبادلے میں پانچ دہشت گرد ہلاک ہو گئے۔
وزیراعظم شہباز شریف نے ایف سی ہیڈکوارٹر پر خوارج دہشت گردوں کے حملے کو ناکام بنانے پر پاکستان آرمی کے جوانوں اور افسران کو خراج تحسین پیش کیا۔ انہوں نے کہا کہ پوری قوم پاک فوج کے ان بہادر افسروں اور جوانوں کو سلام پیش کرتی ہے اور دہشت گردی کے خلاف جنگ میں افواج کے ساتھ متحد ہے۔
وزیراعظم نے حکومت کے اس عزم کا اعادہ کیا کہ دہشت گردی کے مکمل خاتمے تک جنگ جاری رہے گی اور پاکستانی زمین کو دہشت گرد عناصر سے پاک کرنے کے لیے پاک فوج کی کاوشوں کو سراہا۔
