یوتھ ویژن : ( ثاقب ابراہیم غوری سے ) چیف آف آرمی اسٹاف جنرل سید عاصم منیر نے یوم دفاع پاکستان کے موقع پر ایک خاص پیغام جاری کیا، جس میں 6 ستمبر کی اہمیت کو اجاگر کیا۔ انہوں نے کہا کہ اس دن ہماری بری، بحری، اور فضائی افواج نے قوم کے شانہ بشانہ لڑتے ہوئے دشمن کے ناپاک عزائم کو خاک میں ملا دیا تھا۔ جنرل منیر نے اس بات پر زور دیا کہ ستمبر کی جنگ کے دوران قوم میں جو عظیم اتحاد و یکجہتی دیکھنے کو ملی، وہ ہماری مسلح افواج اور قوم کے لیے فخر کا باعث ہے۔ آج بھی یہی جذبہ پاک فوج کو ارضِ وطن کی حفاظت کی ترغیب دیتا ہے اور اس معرکے میں دکھائی گئی جرأت و بہادری نہ صرف تاریخ کے صفحات پر سنہری حروف سے درج ہے بلکہ آنے والی نسلوں کے لیے مشعل راہ بھی ہے۔

جنرل منیر نے اپنے پیغام میں شہداء کو خراج تحسین پیش کرتے ہوئے قرآن مجید کی سورۃ البقرہ کی آیت 154 کا حوالہ دیا: "اور جو اللہ کی راہ میں مارے جائیں، انہیں مردہ نہ کہو بلکہ وہ زندہ ہیں، مگر تم اس کا شعور نہیں رکھتے۔” یہ آیت شہداء کی بلند مقام اور ان پر اللہ کے فضل کی عکاسی کرتی ہے۔

روزنامہ یوتھ ویژن نیوز کا یومِ دفاع پر پاک فوج اور شہداء کو خراجِ تحسین

آرمی چیف نے مادرِ وطن کے دفاع کے لیے اپنی جانیں نچھاور کرنے والے بہادر افسران اور جوانوں کو خراج عقیدت پیش کیا اور ان کے اہل خانہ کی حرمت و حفاظت کی ذمہ داری کا عزم دہراتے ہوئے کہا کہ ایمان، تقویٰ، اور جہاد فی سبیل اللہ پاک فوج کا طرۂ امتیاز ہے اور دشمنوں کے عزائم سے نمٹنے کے لیے ہمارا سب سے بڑا ہتھیار بھی ہے۔

جنرل منیر نے یہ بھی کہا کہ پاک فوج وطن کی دفاع کے لیے پرعزم اور پیشہ ورانہ صلاحیتوں سے لیس ہے۔ ہر افسر اور سپاہی ستمبر کے جذبے کو دل میں بسائے ہوئے پاکستان کی سلامتی و تحفظ کا فرض نبھا رہا ہے۔ دہشت گردی کے خلاف پاک افواج اور قوم کی جرأت اور جوانمردی کی مثال دنیا بھر میں نہیں ملتی۔

انہوں نے بتایا کہ پاکستان کی سکیورٹی فورسز اور قانون نافذ کرنے والے اداروں کی کوششوں کی بدولت پاکستان عدم استحکام سے محفوظ ہے۔ جنرل منیر نے مزید کہا کہ ڈیجیٹل دہشت گردی اور 5ویں نسل کی جنگ نئے چیلنجز کے طور پر ابھر رہی ہیں، جو روایتی دہشت گردی سے زیادہ پیچیدہ اور خطرناک ہیں۔ ملک دشمن عناصر اور غیر ملکی اداروں کے اشتراک نے ڈیجیٹل دہشت گردی کو مزید پیچیدہ اور خطرناک بنا دیا ہے، مگر ہم ملی یک جہتی کے ساتھ پرعزم رہ کر اس خطرے کا مقابلہ کر رہے ہیں۔

آرمی چیف نے اس عزم کا اعادہ کیا کہ پاکستانی قوم اور مسلح افواج کا عزم ناقابلِ تسخیر ہے۔ ہم اپنے پرامن اور محفوظ پاکستان کے عزم کو کسی بھی طاقت سے کمزور نہیں ہونے دیں گے۔ ہم اپنے تمام پڑوسی ممالک کے ساتھ خوشگوار تعلقات کے خواہاں ہیں، مگر وطن عزیز کے دفاع کے لیے ہم ہمہ وقت تیار اور چوکس ہیں۔

جنرل منیر نے مسئلہ کشمیر کے پرامن حل پر زور دیتے ہوئے کہا کہ عالمی برادری کو سمجھنا چاہیے کہ خطے کا امن مسئلہ کشمیر کے پرامن حل سے مشروط ہے۔ کشمیری عوام کی امنگوں اور اقوام متحدہ کی قراردادوں پر عمل پیرا ہونا لازم ہے، اور بھارتی جارحیت اور انسانی حقوق کی پامالی کے باوجود کشمیری بھائیوں کا عزم قابل تحسین ہے۔

آرمی چیف نے واضح کیا کہ پاکستان فلسطینیوں کے حق میں اپنی آواز بلند کرتا رہے گا اور غزہ میں اسرائیلی جارحیت کو عالمی ضمیر پر ایک سیاہ دھبہ قرار دیا۔ انہوں نے اتحاد کی اہمیت پر زور دیتے ہوئے کہا کہ وطن عزیز کی سلامتی و ترقی اور خوشحالی کے عزم کے ساتھ ہم سب متحد رہیں گے اور اختلافات کو بھلا کر مثالی یکجہتی کا مظاہرہ کریں گے۔ انہوں نے کہا کہ جب تک ہم متحد رہیں گے، دنیا کی کوئی طاقت پاکستان کو نقصان نہیں پہنچا سکتی۔