وزیرِ اعظم شہباز شریف سے 5 سالہ گنیز ریکارڈ ہولڈر سفیان محسود کی ملاقات، کھیلوں کے فروغ کی ہدایت
یوتھ ویژن : ( واصب ابراہیم غوری سے ) وزیرِ اعظم شہباز شریف سے پانچ سالہ گنیز ورلڈ ریکارڈ ہولڈر سفیان محسود کی ملاقات، نوجوانوں کے لیے کھیلوں کی سرگرمیوں کو فروغ دینے کی ہدایت-
ڈیرہ اسماعیل خان سے تعلق رکھنے والے پانچ سالہ سفیان محسود، جو حال ہی میں گنیز بک آف ورلڈ ریکارڈ میں اپنا نام درج کروا چکے ہیں، نے وزیرِ اعظم محمد شہباز شریف سے ملاقات کی۔ ملاقات کے دوران سفیان محسود نے کہا کہ وہ مستقبل میں سائنسدان بن کر پاکستان کا نام مزید روشن کریں گے۔
وزیرِ اعظم نے سفیان کے والد، عرفان محسود، سے بھی بات چیت کی، جو خود بھی مارشل آرٹس میں مہارت رکھتے ہیں اور 100 سے زائد گنیز بک آف ورلڈ ریکارڈ کے حامل ہیں۔ عرفان محسود ڈیرہ اسماعیل خان میں مارشل آرٹس کی تربیتی اکیڈمی چلاتے ہیں۔
وزیرِ اعظم شہباز شریف نے چیئرمین یوتھ پروگرام رانا مشہود اور دیگر متعلقہ حکام کو ہدایت کی کہ ملک بھر میں نوجوانوں کو کھیلوں کی مزید سرگرمیاں فراہم کرنے کے لیے اقدامات اٹھائے جائیں۔ انہوں نے یوتھ پروگرام کے تحت مختلف کھیلوں کے فروغ کے لیے بھی حکمت عملی بنانے کی ضرورت پر زور دیا۔
