صدر مملکت کی بلوچستان میں دہشت گردی کے مکمل خاتمے کی ہدایت
یوتھ ویژن : ( واصب ابراہیم غوری سے ) صدر مملکت آصف علی زرداری نے متعلقہ حکام کو ہدایت کی ہے کہ دہشت گردوں کے مکمل خاتمے اور بلوچستان میں سیکیورٹی کی صورتحال کو بہتر بنانے کے لیے تمام ممکنہ اقدامات کیے جائیں۔
انہوں نے یہ ہدایات اسلام آباد میں وزیر داخلہ محسن نقوی اور وزیر اعلیٰ بلوچستان سرفراز بگٹی سے ملاقات کے دوران دیں۔ انہوں نے بلوچستان میں حالیہ دہشت گردی کے حملوں اور صوبے کی مجموعی سیکیورٹی صورتحال پر تبادلہ خیال کیا۔
ملاقات میں وزیر اعلیٰ بلوچستان اور وزیر داخلہ نے صدر مملکت کو بلوچستان میں دہشت گردی کے حالیہ واقعات کے حوالے سے بریفنگ دی اور صوبے میں ریاستی رٹ کے نفاذ سے متعلق تجاویز پر تبادلہ خیال کیا۔
صدر نے دہشت گردوں کے مکمل خاتمے کے لیے موثر اقدامات کی ضرورت پر زور دیا۔
قبل ازیں وزیر داخلہ محسن نقوی کا کہنا تھا کہ بلوچستان میں کسی بڑے آپریشن کی ضرورت نہیں ہے کیونکہ دہشت گردوں پر ایک ایس ایچ او کے ذریعے قابو پایا جاسکتا ہے اور دہشت گردوں کو جلد ہی ’مناسب جواب‘ ملے گا۔
کوئٹہ پہنچنے کے بعد وزیراعلیٰ بلوچستان سرفراز بگٹی کے ہمراہ پریس کانفرنس کرتے ہوئے محسن نقوی نے کہا کہ “وفاقی حکومت وزیراعلیٰ بلوچستان کے ساتھ کھڑی ہے جو حتمی فیصلہ کرے گی۔ انہوں نے کہا کہ بلوچستان کے معاملے پر بہت کام ہو رہا ہے۔
انہوں نے کہا کہ وزیراعلیٰ جو بھی مانگ رہے ہیں انہیں وفاق کی مکمل حمایت حاصل ہے۔ "بلوچستان میں جو کچھ ہوا اس سے ہمیں دکھ ہے۔ یہ واقعات قابل برداشت نہیں ہیں، ہمیں قتل کے ان واقعات سے خوفزدہ نہیں کیا جا سکتا۔
محسن نقوی نے کہا کہ دہشت گردوں کے خلاف کسی بڑے آپریشن کی ضرورت نہیں، ہماری افواج ان سے نمٹنا جانتی ہیں اور ان سے جلد نمٹا جائے گا۔
