پارلیمنٹ ہاؤس کے عملے کو سیاسی سرگرمیوں میں شرکت پر نوٹس جاری

یوتھ ویژن : ( مظہر اسحاق چشتی سے ) سپیکر قومی اسمبلی سردار ایاز صادق نے سیاسی سرگرمیوں میں مبینہ طور پر ملوث ہونے پر پارلیمنٹ ہاؤس کے افسر اور دیگر 4 ملازمین کو شوکاز نوٹس جاری کر دیا۔

ذرائع کے مطابق ڈپٹی سارجنٹ اٹ آرمز سجاد احمد کو مبینہ طور پر سیاسی سرگرمیوں میں ملوث ہونے پر چارج شیٹ پیش کر دی گئی ہے۔ مزید برآں، پارلیمنٹ ہاؤس کے چار دیگر عملے کو وارننگ جاری کی گئی ہے۔

ذرائع نے انکشاف کیا ہے کہ سجاد کی ڈیوٹی بھی اپوزیشن لیڈر عمر ایوب کے چیمبر سے ٹرانسفر کر دی گئی ہے جہاں وہ پہلے تعینات تھے جب کہ وارننگ ملنے والے دیگر 4 سٹاف ممبران اسد قیصر کے ساتھ کام کر رہے تھے۔

ذرائع نے مزید کہا کہ سجاد احمد اپنے علاقے سے لوگوں کو تحریک انصاف کے دھرنے میں شرکت کے لیے متحرک کرنے میں ملوث تھا، باوجود اس کے کہ اسے ایسا نہ کرنے کی تنبیہ کی گئی تھی۔

اس سے قبل مئی میں قومی اسمبلی کے اسپیکر نے پارلیمنٹ ہاؤس میں غیر مجاز افراد کے داخلے پر آٹھ سیکیورٹی اہلکاروں کو معطل کردیا تھا۔

ذرائع کا کہنا ہے کہ معطل کیے گئے ملازمین کو پارلیمنٹ ہاؤس کے اندرونی دروازوں پر تعینات کیا گیا تھا۔

ذرائع نے مزید بتایا کہ سارجنٹ ایٹ آرمز کو معطل کیے گئے اہلکاروں کے خلاف انکوائری کرنے کی ہدایت کی گئی تھی، جنہوں نے غیر مجاز افراد کو بغیر شناختی کارڈ کے پارلیمنٹ ہاؤس میں داخل ہونے کی اجازت دی۔

یہ واقعہ اس وقت سامنے آیا جب وزیر دفاع خواجہ آصف نے اس واقعے کی شکایت سپیکر سے کی۔

انہوں نے قومی اسمبلی (NA) کی عمارت اور اس کی لابی کے احاطے میں حفاظتی اقدامات کو یقینی بنانے پر زور دیا۔