نگراں وزیراعظم انوارالحق کاکڑ سے ازبکستان کےصدرشوکت مرزایوف کی ملاقات، سیاسی، تجارتی، اقتصادی، سلامتی، دفاعی شعبوں میں دوطرفہ تعاون کو مزید گہرا کرنے پر تبادلہ خیال
نگراں وزیر اعظم انوار الحق کاکڑ سے ازبکستان کے صدر شوکت مرزایوف کی ملاقات، سیاسی، تجارتی، اقتصادی، سلامتی، دفاع اور رابطوں سمیت مختلف شعبوں میں دوطرفہ تعاون کو مزید گہرا کرنے پر تبادلہ خیال
نگراں وزیر اعظم انوار الحق کاکڑ نے نیویارک میں اقوام متحدہ کی جنرل اسمبلی کے 78ویں اجلاس کے موقع پر ازبکستان کے صدر شوکت مرزایوف سے ملاقات کی۔دونوں فریقوں نے سیاسی، تجارتی، اقتصادی، سلامتی، دفاع اور رابطوں سمیت مختلف شعبوں میں دوطرفہ تعاون کو مزید گہرا کرنے پر تبادلہ خیال کیا۔ بدھ کو وزیراعظم آفس کے میڈیا ونگ سے جاری کردہ بیان کے مطابق وزیراعظم نے گزشتہ چند سالوں میں دوطرفہ تعاون کی بڑھتی ہوئی سطح پر اطمینان کا اظہار کرتے ہوئے اس رفتار کو برقرار رکھنے کی اہمیت پر زور دیا۔ انہوں نے اس بات پر زور دیا کہ ترجیحی تجارتی معاہدے (پی ٹی اے) اور ٹرانزٹ ٹریڈ ایگریمنٹ (یوپی ٹی ٹی اے) کو فعال کرنے سے دونوں ممالک کے درمیان تجارت اور ٹرانزٹ کو فروغ ملے گا۔دونوں فریقوں نے علاقائی اقتصادی انضمام کو فروغ دینے اور بین العلاقائی رابطوں کے لیے فعال کردار ادا کرنے کے عزم کا اعادہ کیا۔وزیراعظم نے ٹرانس افغان ریلوے منصوبے کی بروقت تکمیل کے لیے پاکستان کے پختہ عزم کا اعادہ کیا۔ انہوں نے یہ بھی کہاکہ علاقائی روابط، تجارت اور اقتصادی انضمام کا افغانستان پر بھی مستحکم اثر پڑے گا۔انہوں نے خطے کی حالیہ پیش رفت اور علاقائی سلامتی اور استحکام سے متعلق امور پر بھی تبادلہ خیال کیا۔
