پیٹرولیم مصنوعات کی قیمتوں میں ایک بار پھر اضافے کا امکان

یوتھ ویژن نیوز : عوام پر ایک بار پھر پیٹرول بم گرانے کی تیاری،16 ستمبر سے پیٹرولیم مصنوعات کی قیمتوں میں بڑے اضافے کا امکان ہے۔

میڈیا رپورٹس کے مطابق پیٹرولیم مصنوعات کی قیمتوں میں 23 روپے 50 پیسے فی لیٹر تک اضافے کا امکان ظاہر کیا جا رہا ہے،اوگرا نے پیٹرولیم مصنوعات کی ورکنگ تیار کر لی۔ ذرائع کے حوالے سے بتایا گیا ہے کہ پیٹرول کی قیمت میں 16 سے 17 روپے فی لیٹر تک اضافے کا امکان ہے،جبکہ ڈیزل کی قیمت میں 24 روپے فی لیٹر اضافہ متوقع ہے۔

یہ بھی پڑھیں: حج 2024 میں حاجیوں کی سہولت کیلئے بڑے فیصلے

اس کے علاوہ پیٹرول پر لیوی میں 5 روپے فی لیٹر اور ڈیزل پر بھی لیوی میں اضافہ متوقع ہے۔ ان ٹیکسز سے آئی ایم ایف کیلئے اضافی ریونیو اکٹھا کیا جائے گا،اوگرا حتمی سمری کل وزارتِ خزانہ کو بھجوائے گا۔
دوسری جانب ملک میں تیل بحران پیدا ہونے کا خدشہ پیدا ہو گیا، پٹرول اور ڈیزل مہنگا ہونے کے امکان کے باعث ڈیلرز نے پٹرولیم مصنوعات کی ذخیرہ اندوزی شروع کر دی۔

ملک کے کئی شہروں میں ڈیلرز کی جانب سے پٹرولیم مصنوعات ذخیرہ کیے جانے کی اطلاعات سامنے آئی ہیں،اور اس حوالے سے وفاقی حکومت کی جانب سے بتایا گیا کہ ملک میں چند مقامات پر بعض آئل مارکیٹنگ کمپنیوں کے ریٹیل آؤٹ لیٹس مبینہ طور پر خشک پائے گئے۔ وزارت پٹرولیم نے چیئرمین اوگرا سے خشک ریٹیل آؤٹ لیٹس چلانے والی کمپنیوں کے خلاف ضابطے کی کارروائی کیلئے مراسلہ لکھ دیا۔

یہ بھی پڑھیں: مستونگ میں دھماکا، حافظ حمد اللہ سمیت متعدد افراد زخمی
اوگرا کو ہدایت کی گئی کہ ملک میں اس وقت پٹرول اور ہائی سپیڈ ڈیزل کا وافر ذخیرہ موجود ہے، لہذا اس بات کو یقینی بنایا جائے کہ تمام مارکیٹنگ کمپنیاں اپنے ریٹیل آؤٹ لیٹس خالی نہ رکھیں اور پٹرولیم مصنوعات کی فراہمی کا سلسلہ جاری رکھیں۔ خیال رہے کہ عالمی مارکیٹ میں خام تیل کی قیمتوں میں اضافے کی وجہ سے پاکستان میں بھی 16 ستمبر سے پٹرولیم مصنوعات کی قیمتوں میں مزید اور نمایاں اضافے کا امکان ظاہر کیا جا رہا ہے