پاکستان تاپی گیس پائپ لائن منصوبے کی جلد تکمیل اور وسطی ایشیائی ریاستوں کے ساتھ دیرپا تعلقات کا خواہاں ہے ،وزیر خارجہ مخدوم شاہ محمود قریشی

اسلام آباد۔ (عمران قذافی سے ):وزیر خارجہ مخدوم شاہ محمود قریشی نے کہا ہے کہ پاکستان تاپی گیس پائپ لائن منصوبے کی جلد تکمیل کے لئے پر عزم ہے،ہم وسط ایشیا وژن کے تحت، وسط ایشیائی ریاستوں کے ساتھ دیرپا اور نتیجہ خیز تعلقات کے خواہاں ہیں۔

یہ بات انہوں نے ترکمانستان کے اپنے ہم منصب راشد میرودوف سےبات چیت کرتے ہوئے کہی جنہوں نے او آئی سی وزرائے خارجہ کونسل کے غیر معمولی اجلاس کے موقع پر ہفتہ کو وزارتِ خارجہ میں ان سے ملاقات کی۔

ملاقات کے دوران دو طرفہ تعلقات ،علاقائی صورتحال سمیت باہمی دلچسپی کے امور پر تبادلہ خیال کیا گیا ۔ وزیر خارجہ نے او آئی سی وزرائے خارجہ کونسل کے غیر معمولی اجلاس میں شرکت کیلئے پاکستان تشریف آوری پر ترکمانستان کے وزیر خارجہ کا شکریہ ادا کیا۔

شاہ محمود قریشی نے کہا کہ ترکمانستان، وسط ایشیا کا ایک اہم ملک ہونے کے ناطے پاکستان کیلئے خصوصی اہمیت کا حامل ہے ۔ترکمانستان کی عوام اور قیادت کو “مستقل غیر جانبداری” کے پچیس سال مکمل ہونے پر مبارکباد پیش کرتے ہیں۔ہم وسط ایشیا وژن کے تحت، وسط ایشیائی ریاستوں کے ساتھ دیرپا اور نتیجہ خیز تعلقات کے خواہاں ہیں۔

وزیر خارجہ نے، روابط کے فروغ کے ذریعے دو طرفہ تجارت بڑھانے کیلئے مشترکہ کوششیں بروئے کار لانے کی ضرورت پر زور دیا اور کہا کہ ترکمانستان کو مشرق وسطیٰ، افریقہ کے ساتھ تجارتی روابط کیلئے، گوادر اور کراچی بندرگاہوں تک رسائی دینے میں، ہمیں خوشی محسوس ہو گی، پاکستان تاپی گیس پائپ لائن منصوبے کی جلد تکمیل کے لئے پر عزم ہے۔

انہوں نے کہا کہ پاکستان، مارچ 2022 میں او آئی سی وزرائے خارجہ کونسل کے اڑتالیسویں اجلاس کی میزبانی کا منتظر ہے، یکے بعد دیگرے دو وزرائے خارجہ کونسل کے اجلاسوں کی میزبانی، مسلم امہ کیلئے پاکستان کی سنجیدہ سوچ کی مظہر ہے، مخدوم شاہ محمود قریشی نے کہا کہ پاکستان، او آئی سی کو مسلم امہ کی مستحکم آواز گردانتے ہوئے، اسلامو فوبیا، امن و سلامتی اور تنازعات کیلئے حل کیلئے او آئی سی کے موثر کردار کا متقاضی ہے۔چالیس سال کی جنگ و جدل کے بعد افغانستان میں قیام امن کی امید پیدا ہوئی ہے۔

وزیر خارجہ نے کہا کہ افغانستان میں ابھرتے ہوئے انسانی بحران کے لیے فوری اقدامات نہ کیے گئے تو اس کے مضمرات ہمسایہ ممالک، خطے اور دنیا بھر کو متاثر کر سکتے ہیں۔ہم مسئلہ کشمیر کے حوالے سے او آئی سی کی مسلسل اور غیر متزلزل حمایت پر اس کے مشکورہیں، ترکمانستان کے وزیر خارجہ نے پر خلوص میزبانی پر وزیر خارجہ مخدوم شاہ محمود قریشی کا شکریہ ادا کیا۔