کریانہ مالکان کی لاٹری نکل پڑی، سبسڈی کے ساتھ کمیشن بھی ملے گا

اسلام آباد۔17دسمبر (اے پی پی):وزیر اعظم کی معاون خصوصی برائے تخفیف غربت و سماجی تحفظ سینیٹر ڈاکٹر ثانیہ نشتر نے کہاہے کہ اقتصادی رابطہ کمیٹی ( ای سی سی )نے کریانہ ریٹیلرز کے لئے 8فیصد احساس راشن کمیشن کی منظوری دے دی ہے،احساس راشن رعایت ڈیزائن کے تحت کریانہ ریٹیلرز کے لئے 8فیصد خصوصی کمیشن عالمی طریقہ کارکے عین مطابق ہے۔

جمعہ کو یہاں جاری بیان میں انہوں نے مزید کہاکہ یہ خصوصی پیشکش کریانہ ریٹیلرز کی راشن رعایت پروگرام کے ذریعے سبسڈی کی تقسیم میں حکومت کی مدد کرنے میں حوصلہ افزائی کرے گی۔

تخفیف غربت و سماجی تحفظ ڈویژن کے مطابق کریانہ ریٹیلرز کو بااختیار بناتے ہوئے احساس راشن کمیشن انہیں نقد پر مبنی لین دین سے الیکٹرانک لین دین کی طرف منتقل کرنے، اپنے بینک اکاؤنٹس کھولنے، انٹرنیٹ سے چلنے والے آلات نصب کرنے اور پروسیسنگ پر خرچ ہونے والے اضافی وقت کی تلافی کرنے کے قابل بنائے گا۔

سرکاری بیان کے مطابق کریانہ ریٹیلرز بھی ہر سہ ماہی ہونے والے لکی ڈرا سےکاریں، موٹر سائیکلیں، موبائل فون اور دیگر مختلف انعامات جیت کرفائدہ اٹھائیں گے اور یہ ان کی کارکردگی سے منسلک ہوگا۔ نیشنل بینک آف پاکستان (این بی پی) احساس راشن رعایت پروگرام کے لیے حکومت کا عملدرآمدی شراکت دار ہے۔فی الحال احساس راشن پورٹل

(https://ehsaasrashan.pass.gov.pk/)

ملک بھر میں تمام پیمانے کے کریانہ ریٹیلرز کو رجسٹر کرنے کے لئے کھلا ہے۔ کریانہ ریٹیلرزکے لیے بینک اکاؤنٹ کا ہونا لازمی ہے۔ جن کے بینک اکاؤنٹس نہیں ہیں انہیں NBP کی قریبی شاخوں میں اپنے بینک اکاؤنٹس کھولنے کی سہولت فراہم کی جا رہی ہے۔

خاندان 8171 کے ذریعے رجسٹر کر سکتے ہیں۔رجسٹریشن کے بعد، کریانہ اسٹورز کی موجودگی کی تصدیق کی جائے گی۔ کریانہ اسٹورز اسٹیٹ بینک آف پاکستان کے تمام چیکس سے گزریں گے جن میں نادرا کی طرف سے CNIC کی تصدیق، PMD/PTA کی طرف سے سم کی ملکیت کی تصدیق، تمام بینکنگ چیکس (AMI, KYC)اور بائیو میٹرک تصدیق شامل ہے۔ تصدیق کے عمل کوپاس کرنے کے بعد، کریانہ ریٹیلرز کو انکے سیل فونز میں موبائل پوائنٹ آف سیل (mPOS) ایپ کے ذریعے اہل خاندانوں کو سبسڈی تقسیم کرنے کا اختیار دیا جائے گا۔

احساس راشن رعایت پروگرام کو معاشرے کے غریب ترین طبقات کی بہتری کے لیے وزیر اعظم کے وژن کے مطابق متعارف کرایا گیا ہے۔ اس پروگرام کو پنجاب، کے پی، اے جے کے اور جی بی کی وفاقی اور صوبائی حکومتیں مشترکہ طور پر فنڈ فراہم کرتی ہیں۔ احساس راشن میں گندم کا آٹا، دالیں، کھانا پکانے کا تیل اور گھی شامل ہے۔

120 ارب روپے کا پروگرام احساس راشن سے چلنے والے کریانہ اسٹورز کے نیٹ ورک کے ذریعے 20 ملین خاندانوں کو فائدہ پہنچائےگا۔ ہر اہل خاندان کو 1,000 روپے ماہانہ کی سبسڈی دی جائے گی