عمرہ ادا کرنے والوں کےلیےخوشخبری عمر کی حد بھی واضع کر دی

ریاض ۔ (عمران قذافی سے ):سعودی وزارت حج وعمرہ نے کہا ہے کہ بیرون ممالک سے 12 برس اور اس سے زیادہ عمر کے افراد کو عمرہ ویزے جاری کیے جائیں گے۔عرب ذرائع ابلاغ کے مطابق وزارت حج و عمرہ نے اپنے ایک بیان میں بتایا کہ مسجد الحرام ، مسجد نبوی اور روضہ شریفہ میں نماز اور عمرہ کی اجازت کے بعد 12 سے زیادہ عمر کے سعودی شہریوں، اندرون مملکت مقیم غیر ملکیوں، جی سی سی ممالک کے باشندوں اور مختلف ویزوں پر آنے والے افراد کوعمرہ ویزے دینے کا فیصلہ کیا گیا ہے۔

انہوں نے بتایا کہ مختلف ویزوں پر بیرون ممالک سے آنے والوں کے لیے ضروری ہو گا کہ وہ سعودی عرب پہنچنے سے قبل قدوم پلیٹ فارم پر ویکسین کا اندراج کرائیں اور مملکت پہنچنے کے بعد توکلنا اور اعتمرنا میں اندراج کرائیں پھر توکلنا صحت اپ ڈیٹ کرانے کے بعد توکلنا یا اعتمرنا ایپس میں سے کسی ایک کے ذریعے عمرہ ، نماز اور زیارت کے اجازت نامے حاصل کر یں ۔

انہوں نے کہا کہ عمرہ کمپنیاں بیرون ممالک سے عمرہ ویزے پر آنے والوں کے لیے مطلوب اجازت نامے جاری کرائیں گی۔ واضح رہے کہ قبل ازیں وزارت حج و عمرہ نےکہا تھا کہ بیرون ممالک سے عمرہ کا اجازت نامہ اور مسجد الحرام میں نماز کا اجازت نامہ صرف ان زائرین کے لیے جاری ہو گا جن کی عمریں 18 سے 50 برس ہوں گی بعد ازاں وزارت نے 50 والی انتہائی حد ختم کر دی اور 12برس اور اس سے زیادہ عمرکے افراد کو عمرے پر آنے کی اجازت دے دی ہے۔