نوازشریف کی پارٹی صدر کے عہدے پر بحالی :ہائیکورٹ کا بڑا فیصلہ

لاہور ہائیکورٹ نے مسلم لیگ ن کے قائد نواز شریف کو پارٹی صدرات کے عہدے پربحال کرنے کی درخواست ناقابل سماعت قرار دے دی۔

تفصیلات کےمطابق لاہور ہائیکورٹ کے جسٹس علی باقر نجفی نے نواز شریف کو پارٹی صدر کے عہدے پر بحال کرنے کے لیے دائر درخواست پر اعتراض کی سماعت کی۔ عدالت نے رجسٹرار  آفس کا اعتراض برقرار رکھا اور درخواست ناقابل سماعت قرار دے دی۔

واضح رہے کہ لاہور ہائیکورٹ میں نواز شریف کو بطور مسلم لیگ نون کے صدر بحالی کے لیے وکیل آفاق ایڈووکیٹ نے درخواست دائر کی تھی جس میں موقف اختیار کیا گیا تھا کہ 2017 میں نواز شریف کو  قومی اسمبلی سے  نااہل قرار دیا گیا، عمران خان، شیخ رشید، سراج الحق نے نواز شریف کو سربراہی سے ہٹانے کی درخواست دائر کی تھی اور 2018 میں عدالت نے انہیں پارٹی صدارت سے ہٹانے کا حکم دے دیا

درخواست میں کہا گیا کہ الیکشن کمیشن نے این اے 95 میانوالی سے عمران خان کوبھی نااہل قرار دیا مگر انہیں پارٹی سربراہی سے نہیں ہٹایا گیا، اس لیے نواز شریف کو بھی پارٹی صدارت پر بحال کیا جائے۔

درخواست میں عمران خان، شیخ رشید، سراج الحق، الیکشن کمیشن، وفاقی حکومت اور وزیراعظم پاکستان کو فریق بنایا گیا۔