پنجاب اور کے پی الیکشن اکتوبرسے قبل کرانا مشکل ہیں: وزیراعظم شہبازشریف
یوتھ ویژ ن نیوز : وزیر اعظم شہباز شریف کی رہائش گاہ پر ہونے والے ن لیگ کے غیرمعمولی اجلاس کی اندرونی کہانی منظر عام پر آگئی ہے۔
وزیر اعظم شہباز شریف کی زیر صدارت ماڈل ٹاؤن رہائشگاہ پر مسلم لیگ ن کا اہم مشاورتی اجلاس ہوا جس میں سپریم کورٹ میں جاری مقدمات اور سیاسی صورتحال پر تفصیلی غور کیا گیا۔
اجلاس میں معاون خصوصی وزیراعظم ملک احمد خان،ایاز صادق، ملک احمد خان،عطاء اللہ تارڑ اور احد چیمہ سمیت دیگر شریک ہوئے۔
اجلاس میں سپریم کورٹ میں کل کی سماعت بارے آئینی،قانونی پہلوؤں پر غوروخوص کیا گیا۔ وزیر قانون اعظم نذیر تارڑ نے سپریم کورٹ کی کل کی سماعت پر بریفنگ دی۔ شہباز شریف کی زیر صدارت اجلاس میں فل بنچ کی استدعا مسترد ہونے پر ریویو میں جانے پر قانونی پہلوؤں پر مشاورت کی گئی۔
اس موقع پر وزیراعظم شہبازشریف کا کہنا تھا کہ پنجاب اور کے پی الیکشن اکتوبر سے قبل کرانا مشکل ہیں۔ الیکشن ہونے چاہئیں لیکن موجودہ صورتحال میں الیکشن ممکن نہیں۔ ہم ملکی معیشت کو ٹھیک کرنے کے لئے دن رات کوشش کر رہے ہیں اور مہنگائی کی لہر پر جلد قابو پا لیں گے۔ ہم تعمیری سیاست پر یقین رکھتے ہیں یہ وقت تخریبی سیاست کا نہیں۔
اس موقع پر لیگی رہنماؤں نے اظہار خیال کیا کہ ہمیں سپریم کورٹ کا احترام ہے لیکن اختلافی نوٹ سے ابہام پیدا ہو گیا ہے۔
