جیفری پیاٹ اسسٹنٹ سکریٹری برائے محکمہ خارجہ کی وزیر اعظم سے ملاقات
یوتھ ویژن نیوز : امریکی محکمہ خارجہ میں توانائی کے وسائل بیورو کے اسسٹنٹ سکریٹری جناب جیفری پیاٹ نے آج وزیر اعظم سے ملاقات کی۔ مسٹر پیاٹ پاک-امریکہ انرجی سیکیورٹی ڈائیلاگ۔ کے لیے امریکی وفد کی قیادت کر رہے ہیں۔
وزیراعظم نے پاکستان امریکہ انرجی سیکیورٹی ڈائیلاگ کے انعقاد کو سراہا۔ انہوں نے کہا کہ پاکستان توانائی کے بنیادی ڈھانچے میں مزید سرمایہ کاری کی حوصلہ افزائی کرتا ہے تا کہ متبادل توانائی کی طرف منتقلی میں مدد ملے.
اسسٹنٹ سیکرٹری نے قابل تجدید توانائی کی پالیسی پر پاکستان کی تعریف کی۔
وزیراعظم نے پاکستان اور امریکہ کے درمیان تجارت اور سرمایہ کاری، صحت، سلامتی اور موسمیاتی تبدیلی جیسے شعبوں میں جاری مذاکرات اور تعاون کا خیرمقدم کیا۔ ملاقات کے دوران دونوں اطراف نے اقتصادی ترقی، توانائی کی حفاظت، سیلاب سے بحالی کی طویل مدتی کوششوں میں شراکت داری، اور دونوں ممالک کے درمیان مجموعی تعلقات کو مضبوط بنانے کے عزم کا اعادہ کیا۔
پاک امریکہ انرجی سیکیورٹی ڈائیلاگ ایک مشترکہ اقدام ہے جس کا مقصد توانائی کی حفاظت کو فروغ دینا ہے اور یہ امریکہ اور پاکستان کے درمیان دو طرفہ توانائی کی ترجیحات، قابل تجدید توانائی کی منتقلی کو آگے بڑھانے، اور توانائی کے شعبے میں اقتصادی اور تجارتی مواقع کی تلاش کے لیے اعلیٰ سطحی بات چیت کے لیے ایک پلیٹ فارم کے طور پر کام کرتا ہے۔
اسی ملاقات کے دوران اسسٹنٹ سیکرٹری برائے سمندر، ماحولیات اور سائنس محترمہ مونیکا میڈینا جو کہ سرکاری دورے پر پاکستان میں ہیں، نے وزیر اعظم کو بتایا کہ وہ پاک امریکہ موسمیاتی اور ماحولیات ورکنگ گروپ کی میٹنگز کے لیے ایک وفد کی قیادت کر رہی ہیں۔ انہوں نے اس عزم کی تعریف کی جس کے ساتھ حکومت پاکستان نے گزشتہ سال کے تباہ کن سیلاب کا سامنا کیا. پرنسپل ڈپٹی اسسٹنٹ سکریٹری برائے جنوبی وسطی ایشیا، محترمہ الزبتھ ہورسٹ، اور چیف کلائمیٹ آفیسر، ڈیولپمنٹ فنانس کارپوریشن (DFC)، مسٹر جیک لیوین، بھی وفد میں شامل تھے۔ سینئر امریکی سفارت کاروں نے بائیڈن انتظامیہ کی پاکستان امریکہ تعلقات ,تجارت اور سرمایہ کاری، صحت، سلامتی اور موسمیاتی تبدیلی کے شعبوں میں تعاون کو بڑھانے کی خواہش کا اظہار کیا۔
اجلاس میں وفاقی وزیر خزانہ اسحاق ڈار، وفاقی وزیر برائے اقتصادی امور سردار ایاز صادق، وفاقی وزیر برائے موسمیاتی تبدیلی شیری رحمان، وفاقی وزیر منصوبہ بندی و ترقی احسن اقبال، وفاقی وزیر برائے پاور انجینئر خرم دستگیر، مشیر وزیراعظم احد چیمہ، وزیر مملکت برائے پیٹرولیم مصدق ملک، وزیراعظم کے معاونین خصوصی طارق فاطمی، جہانزیب خان اور سید فہد حسین نے بھی شرکت کی.
