چین نےغیر ملکی سیاحوں کیلئے ویزے بحال کرنے کا اعلان
یوتھ ویژن نیوز : چین نے کورونا وائرس کی وجہ سے بند سرحدیں غیر ملکی سیاحوں کے لیے کھولنے کا اعلان کردیا ہے۔
رپورٹ کے مطابق کورونا وائرس کیخلاف کامیابی کے اعلان کے بعد حکومت نے سفری اور سیاحتی پابندیوں کو لے کر اہم اقدامات اٹھائے ہیں۔ چین نے کورونا وائرس کے بعد تین سال سے ملک میں غیرملکی سیاحوں کی آمد پر پابندی عائد کررکھی تھی جسے اب ہٹاتے ہوئے غیر ملکی سیاحوں کے لیے ویزے بحال کردیے گئے ہیں۔
چینی حکومت نے 20 مارچ 2020 کو غیر ملکی سیاحوں کو ویزے جاری کرنا بند کردیے تھے جس سے چین کی معیشت کو نقصان پہنچا تھا لیکن اب چینی حکومت نے سیاحوں کے لیے ویزوں کی بحالی کا اعلان کیا ہے۔ کروز شپ کے ذریعے شنگھائی اور ہینان جزیرے سے آنے والے لوگوں کیلئے ویزا فری انٹری کا اعلان کیا گیا ہے جب کہ ہانگ کانگ اور مکاؤ سے آنے والے سیاح بھی ویزا فری انٹری کے اہل ہیں۔اس کے علاوہ یورپ میں موجود چین کے سفارتخانے ویزا درخواستوں کی بحالی کا عمل بھی جلد شروع کریں گے۔چین کی معیشت میں سیاحت کا اہم کردار ہے اور کورونا وباء کے باعث سیاحت بند ہونے سے چینی معیشت کو بڑا نقصان ہوا ہے۔ اب چینی حکام تین سال بعد سیاحت کھولے جانے پر بڑی تعداد میں غیر ملکی سیاحوں کی آمد کا امکان ظاہر کررہے ہیں۔ چین کا کہنا ہےکہ 2022 میں اس کی جی ڈی پی میں صرف تین فیصد اضافہ ہوا جو 50 سال کے بعد بدترین شرح ہے۔