بابراعظم اورصائم نے گلیڈی ایٹرز کو دھوڈالا
یوتھ ویژن نیوز : پاکستان سپر لیگ (پی ایس ایل) سیزن 8 کے 25 ویں میچ میں پشاور زلمی نے کوئٹہ گلیڈی ایٹرز کو جیت کے لیے 241 رنز کا پہاڑ جیسا ہدف دے دیا۔
پنڈی اسٹیڈیم میں کھیلے جا رہے میچ میں پشاور زلمی نے کوئٹہ گلیڈی ایٹرز کے خلاف ٹاس جیت کر پہلے بیٹنگ کا فیصلہ کیا۔
پشاور زلمی کی سلامی جوڑی بابراعظم اور صائم ایوب نے اپنی دھواں دار بیٹنگ سے گلیڈی ایٹرز کے بولرز کے بکھیے ادھیڑ دیے اور میدان کے چاروں اطراف چوکوں اور چھکوں کی بارش کر ڈالی۔
سلامی جوڑی نے پہلی وکٹ کے لیے ریکارڈ 162 رنز کی شراکت داری قائم کی، صائم ایوب 74 کے انفرادی اسکور پر آؤٹ ہوئے۔
اس موقع پر بابر کا ساتھ دینے کے لیے پاوول میدان میں آئے، دونوں بیٹرز نے جارحانہ انداز جاری رکھا اور دوسری وکٹ کے لیے 62 رنز کی شراکت داری قائم کی۔
بابراعظم نے ٹی ٹوئنٹی کیریئر کی آٹھویں سنچری اسکور کی۔ انہوں نے 115 رنز کی اننگز کھیلی جس میں تین چھکے اور 15 چوکے شامل تھے۔
اس میچ میں شکست کی صورت میں کوئٹہ گلیڈی ایٹرز ٹورنامنٹ سے باہر ہو جائے گی۔
