پاکستان کی سول سوسائٹی نے جمہوریت کے استحکام اور ملکی ترقی میں اہم کردار ادا کیا ہے، سپیکر قومی اسمبلی اسد قیصر کا ڈی آر آئی نیشنل کانفرنس سے خطاب

اسلام آباد۔ (مبشر بلوچ سے ):سپیکر قومی اسمبلی اسد قیصر نے کہا ہے کہ پاکستان کی سول سوسائٹی نے جمہوریت کے استحکام اور ملکی ترقی میں اہم کردار ادا کیا ہے، پارلیمنٹ جمہوریت کو کامیابی سے پروان چڑھتا ہوا دیکھنا چاہتی ہے۔

منگل کو ڈیمو کریسی رپورٹنگ انٹر نیشنل ، ڈی آر آئی نیشنل کانفرنس سے خطاب کرتے ہوئے انہوں نے ڈی آر آئی قومی کانفرنس کے انعقاد کو سراہا اور کہا کہ سول سوسائٹی کا کام معاشرے میں بے حد اہمیت کا حامل ہے، حکومت سول سوسائٹی کے ساتھ بھرپور تعاون کر رہی ہے ، پارلیمنٹ میں بچوں کی بہتری کیلئے قانون سازی ہو رہی ہے، اسلام آباد میں بچوں کی تعلیم کے ساتھ ساتھ شیلٹر ہومز بھی بنائے جا رہے ہیں۔

قومی اسمبلی میں ایک کمیٹی بنائی گئی جو اس پر کام کر رہی ہے،کمیٹی میں تمام پارٹیوں کی نمائندگی ہے،انتحابی اصلاحات کے بعد جمہوریت کو مزید تقویت ملے گی۔ انہوں نے کہا کہ سول سوسائٹی کو ایک جگہ اکٹھا کرکے ان کی صلاحیت کے مطابق موقع دیا جائے جس کے لئےپارلیمنٹ کے دروازے کھلے ہیں ۔